Səhiyyə Nazirliyi İctimai Səhiyyə və İslahatlar Mərkəzi tərəfindən 3 iyun 2022-ci ildə “Ginekoloji və pediatrik problemlərə multidissiplinar yanaşma” mövzusunda regional konfrans keçirilib.
Aztibb.az xəbər verir ki, konfransda Şəki, Zaqatala, Balakən, Qəbələ, Mingəçevir, Ağdaş, Göyçay və İsmayıllıda çalışan həkim mama-qinekoloq, pediatr, neonatoloq və ailə həkimləri iştirak ediblər.
Səhiyyə Nazirliyi İctimai Səhiyyə və İslahatlar Mərkəzinin (İSİM) direktor müavini Rahib Məmmədov giriş sözü ilə çıxış edərək bildirib ki, tədbirin məqsədi mama-ginekoloji xidmətinin keyfiyyətinin artırılması, doğuşayardım müəssisələrində çalışan tibb mütəxəssislərinin peşəkarlıq səviyyəsinin yüksəltməsi və praktiki bacaraqlarını təkmilləşdirməsidir.
K.Fərəcova adına Elmi Tədqiqat Pediatriya İnstitunun direktor müavini, neonatoloq Azər Əhmədov, İ.M. Seçenov adına Birinci Moskva Dövlət Tibb Universitetinin Bakı filialının Mamalıq və ginekologiya şöbəsinin müdiri, professor İslam Maqalov, neonatoloqlar - Lalə Nəzərova, Yalçın Mirzəyev, tibb üzrə fəlsəfə doktoru Samirə Tağıyeva, K.Fərəcova adına Elmi Tədqiqat Pediatriya İnstitunun kiçik elmi isçisi, pediatr Aynur İsmayılova, Ə.Əliyev adına Azərbaycan Dövlət Həkimləri Təkmilləşdirmə İnstitutunun Pediatriya kafedrasının dosenti Sənubər Vəliyeva, süni mayalandırma üzrə uzman Kamal Niftiyev, Elmi-Tədqiqat Mamalıq və Ginekologiya İnstitunun Neonatologiya şöbəsinin elmi işçisi, həkim-neonatoloq Lalə Rzayeva çıxış ediblər. İştirakçılara neonatal multisistem inflamator sindrom, PAS (Placenta accreta spektrum) və qeysəriyyə çapığının digər fəsadları, yenidoğulmuşlarda sarılıqlarda izləm, yuvenil qanaxmalar, diafraqma yırtıgı olan yenidoğulmuşlara yanaşma və digər aktual mövzularda ətraflı məlumat verilib, suallar cavablandırılıb.
Qeyd edək ki, konfrans Azərbaycan Respublikası Səhiyyə Nazirliyinin Elmi Tibbi Şurası tərəfindən akkreditasiya olunmuş və 6 DTT kredit balı ilə qiymətləndirilib.
