Tədris Terapevtik Klinikasından verilən məlumata görə, tədbirdə çıxış edən klinikanın həkim-endokrinoloqu, tibb üzrə fəlsəfə doktoru, dosent Məşədiyeva-Bayramova Səbinə xəstəlik və onun diaqnostikası haqqında ətraflı məlumat verib.

 

Şəkərli diabetin yayılmasından danışan məruzəçi qeyd edib ki, hazırda dünyada 480 milyondan çox şəkərli diabet xəstəsi var.

 

Onun sözlərinə görə, xəstəliyin əhali arasında yayılmasını sıralasaq birinci yer Skandinaviya ölkələrinin payına düşür: "Onlardan sonra ABŞ, Qərbi Avropa ölkələri, daha sonra Şərqi Avropa və MDB ölkələridir. Xəstəliyin yayılmış spesifik tiplərinə görə isə xüsusi yeri uzaq Şərq ölkələri və Şərqi Asiya tutur".

 

S. Məşədiyeva bildirib ki, 40 il əvvəl MDB ölkələrində əhalinin 1%-i şəkərli diabetə tutulmuşdursa, hazırda əhalinin 6-7%-i şəkərli diabet xəstəsidir. Hər aşkar formaya iki gizli forma uyğun gəlir. Bütün xəstələrin ümumi sayını götürsək onların 90%-ni tip 2 şəkərli diabet xəstələri təşkil edir, 10%-ni isə tip 1 şəkərli diabet xəstələri təşkil edir.

 

Şəkərli diabetin ilkin müayinələrindən danışan həkim bunu əsaəsən acqarına şəkərin qanda təyini, oral qlükozotolerant testin aparılması, qlikolizə olunmuş hemoqlobinin təyini (HbA1c), qanda C-peptidin və immunoreaktiv insulinin (İRİ) təyini olduğunu bildirib.

 

Bundan əlavə, o, şəkərli diabetin əlamətlərindən də danışıb: "Xəstəliyin əlamətləri əsasən bunlardır: Ağızda daimi quruluq, susuzluq hissi, sidiyə tez-tez getmə, aclıq hissi, arıqlama, zəiflik, yuxu pozulması, dəri quruluğu, dəridə irinli sızanaqlar, sağalmayan yaralar, əzələ ağrıları, zəifliyi, gecə tərləmələri və s."

 

Seminarın sonunda klinikanın həkim-rezidentlərilə birgə mövzu ətrafında geniş müzakirələr aparılıb, suallar cavablandırılıb.