İtburnu çayının müntəzəm surətdə qəbulu insan sağlamlığına çox müsbət təsir edir.

Bu haqda Böyük Britaniyanın Milli Səhiyyə Xidmətinin mütəxəssisləri məlumat veriblər.

İtburnu çayı ürək xəstəliklərinin 2 əsas faktoru olan xolesterin və triqliseridlərin səviyyəsini aşağı salır.

Həmçinin itburnu flavonoidlərlə zəngindir. Flavonoidlər yüksək təzyiqi aşağı salır, qan dövranını yaxşılaşdırır. İtburnu qanda şəkərin və insulinin səviyyəsini normallaşdırır, bununla da insanı 2-ci tip diabetdən qoruyur.

Mütəxəssislərin fikrinə görə, itburnu çayı piylənmənin də əla profilaktikasıdır. Tilirozid antioksidantı sayəsində itburnu piylərin parçalanmasını sürətləndirir.

Bu çay dəriyə də çox müsbət təsir edir, onu cavan saxlayır, gün şüalarının dəriyə olan mənfi təsirini azaldır.

Onu hazırlamaq üçün 1 xörək qaşığı itburnu meyvəsi üçün 1 stəkan qaynar su götürülür. İtburnu meyvələrini dəmləməzdən əvvəl həvəngdəstə ilə yaxşı əzmək lazımdır. Çay axşamdan termosda dəmlənməli, səhər isə bir neçə dəfə steril tənzifdən süzülməlidir. Bu, çox vacibdir. Məsələ burasındadır ki, itburnunun içərisində kiçik tükcüklər var ki, bu tükcüklər mədə-bağırsaq sisteminə düşdükdə, onu qıcıqlandıra bilər.

İtburnu çayını gün ərzində 2-3 dəfə 1/2 stəkan (100 ml) olmaqla qəbul etmək olar.