Aztibb.az xəbər verir ki, İsmayıl Əfəndiyev çıxışında bildirib ki, dünyada olduğu kimi, Azərbaycanda da yay mövsümünün gəlişi ilə əlaqədar ilan və əqrəblərin fəallaşması baş verir. Dünyada hər il tək ilan sancmalara 2,5 milyondan artıq insan intoksikasiya olur. Azərbaycanda isə hər il 100-dən çox ilan sancmaları ilə zəhərlənmələr müşahidə olunur. Bu müraciətlərə əsasən aprelin əvvəlindən noyabr ayına kimi rast gəlinir.

 

Əgər ilan sancmasıdırsa 2 nöqtəvari yer olur. Həmin an həkimə müraciət edilməlidir. Çünki zaman çox böyük rol oynayır. Zəhərli hörümçəklər balaca olduğuna görə insan çox bu sancmaları dərhal hiss etmir. Bir müddət sonra bədəndə şiddətli ağrılar, əzələ gərginliyi, titrəmə baş verir. Ölkəmizdə olan əqrəblərin zəhəri nisbətən azdı. Sancmalar zamanı nahiyədə böyük şişlər müşahidə olunur.

 

İsmayıl Əfəndiyev ilan sancması zamanı ilkin tibbi yardım zamanı nələr etmək lazım olduğuna diqqət çəkib:

 

“İlk növbədə qorxmaq lazım deyil. İlan sancmadan sonra 12 saat ərzində həkimə çatıb, həkim təyinatı ilə zərdab vurulmalıdır. Zərdab yalnız həkim nəzarətində və təyinatında vurulmalıdır. Çünki bu zərdab at qanından alınan immunoloji preparatdı və bir çox insanda allergik anafilaktik reaksiya baş verə bilər.

 

Həmin nahiyəni az hərəkət etdirmək lazımdır. Hərəkət etmək ə zəhərin yayılmasına səbəb olur. İlkin mərhələdə ilan zəhəri bədənə qanla deyil limfatik yollarla yayılır. Bu səbəbdən qan damarlarını sıxmaq olmaz. Nahiyəyə soyuq, sıxmayan sarğı qoymaq, 2 yaxın oynağın hərəkətini azaldaraq həkimə müraciət etmək lazımdır. Ev şəraitində ağrıkəsici və antihistamin preparatlar qəbul etmək olar”.

 

Qeyd edək ki, ilan sancmalarından sonra uzun müddət fəsadlar görə bilirik. Bunun əsas səbəblərdən biri də zəhər limfatik yolla yayıldığı üçün bədən limfatik damarlar zədələnir və həmin nahiyədə şişkinlik olur. Bəzən bu hal uzun illər davam edir. Həmin nahiyəni sıxmaq sağalmanı çox gecikdirir. Ayağın şişməsi, müxtəlif damar problemləri, tromblaşma hətta amputasiyaya qədər gətirib çıxara bilir. Bir daha tövsiyə edirik ki, belə hallarda həkimə zamanında müraciət etmək vacibdir. Tədbirin sonunda Dr.İsmayıl Əfəndiyev iştirakçıların çoxsaylı suallarını cavablandırıb. Seminar iştirakçılar tərəfindən böyük maraqla qarşılanıb.