Azərbaycan Tibb Universitetinin (ATU) Tədris Cərrahiyyə Klinikasında (TCK) rezidentlər üçün aktual tibbi mövzuya həsr olunmuş növbəti maraqlı seminar keçirilib.

 

Aztibb.az xəbər verir ki, tədbir “Mən tiroid əməliyyatını necə icra edirəm?” mövzusunda keçirilib.

 

ATU-nun Tədris Cərrahiyyə Klinikasının endokrinoloq cərrahı Azər Hümmətov rezidentlər üçün qalxanabənzər vəzin cərrahi anatomiyası, əməliyyat üsulları, əməliyyat texnikası barədə geniş məlumat verib. Cərrah həmçinin qayıdan qırtlaq sinirinin variasiyaları, sinir monitorinq cihazı ilə birgə əməliyyatlar və əməliyyat zamanı baş verə biləcək ağırlaşmalar haqqında da rezidentləri məlumatlandırıb.

 

Qeyd edək ki, gələcəyin həkimləri üçün çox faydalı olan bu layihə ATU-nun rezidentura və magistratura şöbəsinin müdiri Məlahət Sultanova və TCK-nın rezidentlərə məsul şəxs Namiq Xəlilovun təşkilatçılığı, universitetin kafedralarının və klinikalarının həkimlərinin dəstəyi ilə həyata keçirilir.