Missiya üzvləri, həmçinin 1 saylı Şəhər Poliklinikasında və TƏBİB-in Elmi-Tədqiqat Tibbi Bərpa İnstitutunda olublar.

 

Qeyd edək ki, ÜST tərəfindən Azərbaycanda reabilitasiya, köməkçi texnologiya (KT) və xidmətlərə əlçatanlığın artırılmasına texniki dəstək göstərmək məqsədilə 4 günlük missiya həyata keçirilib.

Missiyanın məqsədi KT-nin Sürətli Qiymətləndirilməsi (rATA) üzrə ÜST-nin sorğusundan sonra növbəti addımları müəyyənləşdirmək, mövcud milli reabilitasiya, KT təchizatını və sistemini qiymətləndirmək, Azərbaycanın KT yol xəritəsinin gələcək inkişafına dəstək olmaq, o cümlədən reabilitasiya və KT-nin səhiyyə və sosial siyasət sistemlərinə inteqrasiyası üzrə texniki yardım göstərməkdən ibarət olub.

 

ÜST insanların həyat keyfiyyətini yaxşılaşdırmaq üçün səhiyyə sistemlərində reabilitasiya və köməkçi texnologiya məhsullarına əlçatanlığın genişləndirilməsi ilə bağlı qlobal miqyasda təşəbbüslər həyata keçirir. Bu həyati əhəmiyyətli sahələr Ümumdünya Səhiyyə Assambleyası tərəfindən qəbul edilmiş “Reabilitasiya 2030 Fəaliyyətə Çağırış” və “Köməkçi Texnologiyalar üzrə Qlobal Əməkdaşlıq” (GATE) təşəbbüslərində öz əksini tapan qlobal fəaliyyət çağırışlarının əsasını təşkil edir. “ATscale - Köməkçi Texnologiyalar üzrə Qlobal Tərəfdaşlıq “2030-cu ilə qədər daha 500 milyon insanın köməkçi texnologiyalara əlçatanlığını təmin etmək üçün fəaliyyətin sürətləndirilməsini nəzərdə tutur. Bu, sektorlararası tərəfdaşlıq dəyişikliyi sürətləndirmək, mövcud fəaliyyəti inkişaf etdirmək və əlaqələndirmək, o cümlədən uyğun KT-yə əlçatanlığı artırmaq üçün qlobal tərəfdaşları vahid strategiyalarla səfərbər etmək məqsədi daşıyır. Sözügedən təşəbbüs, həmçinin səhiyyə və sosial qayğı sisteminin tərkib hissəsi kimi reabilitasiyanın inkişafı və gücləndirilməsi üçün olduqca əhəmiyyətlidir.