Meymunçiçəyi virusu insanlarda ilk dəfə Konqo Demokratik Respublikasında 9 yaşlı bir uşaqda aşkar edilib.

 

Bu virus təbii çiçəklə eyni ailəyə - Poxviridae ailəsinə, Orthopoxvirus cinsinə mənsubdur. DNT tərkiblidir, zoonozdur, gəmiricilərdən və primatlardan insana yoluxa bilir. Təbii çiçəkdən fərqli olaraq, yoluxdurma qabiliyyəti aşağıdır, əksərən ölümcül deyil və yüngül formada təzahür edir. Daha çox Mərkəzi və Qərbi Afrika bölgəsinin tropik meşələrində rast gəlinən virusdur, lakin digər ərazilərə də yayıla bilir.

 

Meymunçiçəyi virusunun 2 tipi var - Mərkəzi Afrika (Konqo hövzəsi) və Qərbi Afrika. Mərkəzi Afrika tipi daha ağır xəstəliyə səbəb olur. Yoluxmuş şəxslər və ya heyvanlarla yaxın təmas, viruslu əşyalara toxunmaqla xəstəlik digər şəxslərə yoluxur. Cinsi yolla yoluxma üzərində araşdırmalar davam edir.

 

Xəstəliyin inkubasiya dövrü 6-13 gündür, lakin 15-21 gün arasında da dəyişə bilər.

 

Meymunçiçəyinə yoluxmuş şəxslərdə xəstəlik özünü halsızlıq, qızdırma, baş və əzələ ağrısı, üz və ətraflarda, ovuc və ayaq altında, bəzi hallarda ağız boşluğu və cinsiyyət orqanı və konyuktivada səpgilər, limfa düyünlərinin böyüməsi ilə göstərir və 2-4 həftə davam edir.

 

Səpgilərin xarakteri makula, papula, vezikul, pustula və qabıq şəklindədir.