Azərbaycan Tibb Universitetində (ATU) dünya şöhrətli detektiv yazar, Xalq yazıçısı, Azərbaycan Yazıçılar Birliyinin I katibi, hüquq elmləri doktoru Çingiz Abdullayevlə görüş keçirilib.

Əvvəlcə universitetin Tərbiyə işləri üzrə prorektoru, dosent Zülfüqar Musabəyov ATU-nun rektoru, professor Gəray Gəraybəylinin adından görkəmli yazıçını salamlayıb, onun zəngin ədəbi yaradıcılığından söz açıb. Z.Musabəyov bu görüşün əhəmiyyətini vurğulayaraq, əsas məqsədin dünya şöhrətli yazıçı Çingiz Abdullayevi daha yaxından tanımaq olduğunu bildirib. 

Daha sonra Xalq yazıçısı Çingiz Abdullayev yaradıcılığının əsas istiqamətləri barədə danışıb. O, gənclərə klassik və müasir yazıçılarımızın əsərlərini, dünya ədəbiyyatını oxumağı tövsiyə edib. 

Görkəmli yazıçı ölkəmizdə qürur duya biləcəyimiz yeni nəslin yetişdiyini, gənclərimizin xalqın mədəni inkişafı naminə böyük işlər gördüklərini, Vətən müharibəsində xüsusi qəhrəmanlıq göstərdiklərini vurğulayıb.

Çingiz Abdullayev hazırda 4 Xalq şairi və 8 Xalq yazıçısının təmsil olunduğu Azərbaycan Yazıçılar Birliyinin ədəbiyyat tariximizdəki əvəzsiz rolundan bəhs edərək, 1990-cı ilin Qanlı Yanvarı haqqında kitabın hansı şəraitdə yazılmasının geniş ictimaiyyətə məlum olmayan bəzi məqamlarını açıqlayıb.    

"Beyninin məhsulu olan əsərlər hansı dildə yazılmasından asılı olmayaraq oxucunun ruhunu oxşamalı, mənəvi tələbatı ödəməlidir. Vacib məqam yazarın dünya miqyasında qəbul olunması və oxucu kütləsi qazanmasıdır", - deyən Çingiz Abdullayev daha çox dedektiv janrda yazan yazıçı kimi tanınmasına da münasibət bildirib. O, gənclərə “Abırlı adam” kitabını oxumağı məsləhət görüb. Qeyd edib ki, həmin kitabı oxuduqda mənim ümumiyyətlə dedektiv yazmadığımı anlayacaqsız.

Görüş zamanı Çingiz Abdullayevin yaratdığı "Dronqo" obrazının milyonlarla oxucu tərəfindən sevildiyi, bu obrazın öz sələfi olan detektiv qəhrəmanlarının bir çox müsbət keyfiyyətlərini özündə birləşdirdiyi diqqətə çatdırılıb. Görkəmli yazıçının əsərlərinin təkcə Azərbaycanda deyil, dünyanın yüzlərlə ölkəsində böyük məhəbbətlə oxunduğu vurğulanıb.

Çingiz Abdullayev görüşün təşkili üçün Azərbaycan Tibb Universitetinin rəhbərliyinə təşəkkürünü bildirib.

Sonda Xalq yazıçısı görüş iştirakçılarının çoxsaylı suallarını cavablandırıb və oxucuların özləri ilə gətirdikləri kitabları imzalayıb.