AMEA-nın akademik Ə.Quliyev adına Aşqarlar Kimyası İnstitutu (AKİ), Türkiyənin Atatürk Universiteti və Rusiya Elmlər Akademiyasının Sibir Bölməsinin akademik A.Favorski adına İrkutsk Kimya İnstitutunun alimlərinin apardıqları müştərək beynəlxalq tədqiqatlar zamanı mühüm elmi nəticələr əldə olunub.

Kimyaçı alimlərin aldıqları molekulda azot saxlayan 13 ədəd yeni heterosiklik birləşmələrin asetilxolinesteraza və α-qlikozidaza fermentlərinə qarşı fizioloji fəallığı araşdırılıb və məlum olub ki, bu maddələr Alzeymer xəstəliyi və şəkərli diabet də daxil olmaqla, dünyada geniş yayılmış bəzi qlobal xəstəliklərin müalicəsi üçün yeni dərmanların inkişafına kömək edə bilər.

Artıq bu mühüm elmi nəticə məqalə şəklində beynəlxalq bazada referatlaşdırılmış nüfuzlu “ChemistrySelect” jurnalında birgə müəllifliklə dərc olunub.

Məqalə azot əsaslı yeni heterosiklik birləşmələrin sintezi, xarakteristikası, molekulyar dokinqi, asetilkolinesteraza və α-qlikosidazanın inhibə profillərinin qiymətləndirilməsində yeni yanaşmalara həsr edilib.

Qeyd edək ki, “Web of Science” (Clarivate Analytics), “Scopus” (Elsevier) və digər nüfuzlu beynəlxalq elmi bazalarda arxivləşmiş, Q2 kateqoriyalı “Wiley” nəşriyyatının nüfuzlu jurnallarından biri hesab olunan “ChemistrySelect”nin impakt faktoru 2.109-dur. Kimya, biokimya, farmakologiya, tibbi və molekulyar biologiya sahəsində ixtisaslaşmış bu jurnal tibb, kimya və biologiyanın multidissiplinar tədqiqatları ilə bağlı mühüm nəticələri mütəmadi olaraq yayımlayır.