ATU-nun Tədris Cərrahiyyə Klinikasında Əczaçılıq fakültəsinin Tələbə Elmi Cəmiyyətinin konfransı keçirilib.

 

Əvvəlcə Vətən müharibəsi şəhidlərinin və pandemiya dövründə həyatlarını itirən həkimlərin xatirəsi bir dəqiqəlik sükutla yad edilib.

 

Dövlət Himnimizin səsləndirilməsi ilə başlamam tədbir “Qaliblərin qalibini seçirik!” devizi ilə gerçəkləşib.

 

Konfransı giriş sözü ilə açan Əczaçılıq fakültəsinin Tələbə Elmi Cəmiyyətinin elmi rəhbəri, dosent Nərgiz Məmmədova uzun sürən pandemiyadan sonra canlı görüşlərin hər kəsdə məmnunluq hissi yaratdığını söyləyib. O, pandemiya dövründə xoş hadisələrin də baş verdiyini, qələbə sevinci yaşadığımızı və illərlə həsrətində olduğumuz Qarabağa qovuşduğumuzu xatırladıb. N.Məmmədova konfransın ərsəyə gəlməsinə öz dəstəyini əsirgəməyən universitet rəhbərliyinə və “Zeytun” şirkətlər qrupuna təşəkkürünü bildirib.

 

Ölkəmizdə əczaçılığın səviyyəsini qaldırmaq üçün gələcək əczaçıların qarşısında duran vəzifələrdən söhbət açan N.Məmmədova konfransda məruzələrlə çıxış edən gənc tədqiqatçılara uğurlar arzulayıb.

 

ATU-nun Tələbə Elmi Cəmiyyətinin sədri, tibb elmləri doktoru Müşfiq Həsənov istedadlı və ixtisaslaşmış kadrların yetişdirilməsində ali təhsil ocaqlarının rolundan danışıb. O, ATU-da bu məsələyə xüsusi əhəmiyyət verildiyini və bu baxımdan fakültə tələbə elmi cəmiyyətlərinin (TEC) üzərinə mühüm vəzifələrin düşdüyünü vurğulayıb. Qalib tələbələrin və qalib elmi rəhbərlərin akademik təqaüdlə mükafatlandırılmasını təklif edən M.Həsənov, bunun həm də digər tələbələr üçün təşviqat rolunu oynayacağını diqqətə çatdırıb.

 

Daha sonra çıxış edən Əczaçılıq fakültəsinin dekanı, dosent Fərəh Mədətli TEC-in fəaliyyətinə cəlb olunan və maraq göstərən tələbələrin sonradan böyük uğurlara imza atdıqlarını, cəmiyyətdə həmişə fəallıqları ilə seçildiklərini bildirib. Stabil, inkişaf gedən ölkədə yaşamağın böyük xoşbəxtlik olduğunu deyən dekan bu baxımdan Azərbaycan gənclərinin şanslı olduqlarını vurğulayıb. Qeyd edib ki, hərbi cəbhədə qalibiyyət qazanan ölkənin elm cəbhəsində də qalib olması zəruridir. O, tələbələrin ölkə daxilində və beynəlxalq arenalarda xalqımızı layiqincə təmsil edəcəklərinə inamını ifadə edib.

 

Sonda Əczaçılıq fakültəsinin Tələbə Elmi Cəmiyyətinin konfransına hazırlığı əks etdirən videoçarxın təqdimatı olub və TEC-in sədri Lamiyə Yusifovanın sədrliyi ilə panel sessiyasına start verilib.