Aztibb.az xəbər verir ki, açılış nitqi ilə çıxış edərək Forum iştirakçılarını salamlayan Azərbaycan Respublikası Dövlət Gömrük Komitəsi Tibbi Xidmət İdarəsinin rəisi, Əməkdar həkim Ceyhun Məmmədov səhiyyə sahəsində həkimlərlə yanaşı, onların ən yaxın silahdaşı olan tibb bacılarının və digər orta tibb personalının fəaliyyəti və zəhmətinin danılmaz olduğunu vurğulayıb. O, deyib: ”Bildiyiniz kimi, qlobal səhiyyə tendensiyalarına uyğun olaraq bu gün Azərbaycanda da tibb bacısı ixtisasının təkmilləşdirilməsi istiqamətində mühüm addımlar atılmaqdadır.

 

Deyərdim ki, ölkəmizdə bu sahə həm tədris, həm də praktiki bacarıqlar baxımından öz inkişaf dövrünü yaşamaqdadır. Bu gün Respublikamızda baza tibb bacısı təhsili ilə yanaşı, ali «tibb bacısı işi» ixtisasının yaradılması, tibb bacılarının nəzəri və praktiki bilik və bacarıqlarının artırılması istiqamətində təlimlərin həyata keçirilməsi, bu sahədə qurumlararası əməkdaşlığın gücləndirilməsi çox vacib əhəmiyyət kəsb edir.”

 

Mərkəzi Gömrük Hospitalında tibb bacılarının inkişafı üçün mütəmadi olaraq tədbirlər həyata keçirildiyini qeyd edən C.Məmmədov forum vasitəsilə göstərilən səylərin ümumrespublika səviyyəsində bütün tibb bacılarını əhatə etməsindən məmnunluq duyduğunu ifadə edib. C.Məmmədov çıxışının sonunda “12 may Beynəlxalq Tibb Bacısı Günü” münasibətilə tibb bacılarını təbrik edib və forumun işini açıq elan edib.

 

Forumun rəsmi açılış hissəsində Azərbaycan Respublikası Dövlət Gömrük Komitəsi Tibbi Xidmət İdarəsinin Elmi Təcrübi və Tədris Mərkəzinin rəisi, Milli Məclisin Səhiyyə Komitəsinin sədr müavini, Əməkdar həkim, t.e.d. Rəşad Mahmudov, TƏBİB-in İdarə Heyəti sədrinin müşaviri Firəngiz Əliyeva, Mərkəzi Gömrük Hospitalının rəisi Elman Məmmədov, Azərbaycan Tibb Universitetinin elmi işlər üzrə prorektoru Rauf Bəylərov, Azərbaycan Respublikası Səhiyyə Nazirliyi 2 nömrəli Bakı Baza Tibb Kollecinin direktoru, Əməkdar müəllim Dilarə Məmmədəliyeva və Türkiyənin "Florence Nightingale" Xəstəxanalar Qrupunun Tibb bacısı xidmətlərinin təşkili şöbəsinin müdiri Hülya Şahin Uyan da çıxış edib. Çıxış edən spikerlər tibb bacılarının inkişafına istiqamətlənmiş tədbirin bu sahə ilə əlaqəli yerli və beynəlxalq statuslu aidiyyatı qurumları bir platforma ətrafında birləşdirdiyini qeyd edərək mövcud ənənənin Mərkəzi Gömrük Hospitalı tərəfindən başladılmasını yüksək qiymətləndiriblər.

 

Rəsmi hissədən sonra Forum günün birinci yarısında “Orta tibb işçisinin müasir hazırlıq hədəfləri” sessiyası ilə, günün ikinci yarısında “Tibb bacısının işində nəzəriyyənin təcrübəyə tətbiqi” və “Tibb bacılarının peşəkar fəaliyyət standartları” sessiyaları ilə öz işinə davam edib.

 

Tədbirdə Mərkəzi Gömrük Hospitalının yüksəkixtisaslı tibb bacıları ilə yanaşı, Ümumdünya Səhiyyə Təşkilatının Azərbaycan Nümayəndəliyinin mütəxəssisi Halib İbrahim Durak, Dokuz Eylül Universitetinin Tibb bacısı fakultəsinin dosenti Fatma Vural, TƏBİB-in Tibbi fəaliyyətin təşkili departamentinin rəhbəri Teymur Mirzəbəyli, Türkiyə Tibb Bacısı Dərnəyinin rəhbəri Azize Atlı Özbaş və digər spikerlərin də məruzələri dinlənilib.

 

Respublikanın müxtəlif özəl və dövlət tibb müəssisələrində çalışan 80 nəfər tibb bacısının əyani, 200 nəfərədək tibb bacısının distant iştirak etdiyi Forumda tibb bacılarının inkişafı üçün zəruri olan təhsil məsələləri, praktiki bacarıqlar üçün simulyasiya tədrisi, təşkilatlanmanın əhəmiyyəti və digər bir çox mövzularda ümumilikdə 14 məruzə təqdim olunub.

 

Təqdimatların sonunda auditoriyanı maraqlandıran suallar cavablandırılıb.

 

Daha geniş auditoriyanın əhatə edilməsi üçün tədbir "ZOOM" platforması ilə yanaşı Mərkəzi Gömrük Hospitalının rəsmi Facebook səhifəsi üzərindən də canlı yayımlanıb.

 

Forum sertifikatların təqdim edilməsi və qrup şəklinin çəkilməsi ilə yekunlaşdırılıb.