TƏBİB-in İdarə Heyətinin sədri vəzifəsini icra edən Vüqar Qurbanov Almaniyanın Heydelberq Universitetinin Mannheym Tibb Mərkəzinin Cərrahiyyə Klinikasının rəhbəri, prof. Christoph Reissfelder və həmin klinikanın cərrahı Vüqar Yaqublu ilə görüşüb.

 

Görüşdə birgə təcrübə mübadiləsi, tibbi personalın bilik və bacarıqlarının artırılması üçün təlimlərin təşkili, tibb işçilərinin tədqiqatlara cəlb olunması, Almaniya təcrübəsinə əsasən, müasir səhiyyə modelinin yaradılmasında qarşılıqlı əməkdaşlıq, rezidentura təhsili, ağır cərrahi əməliyyatlardan sonra xəstələrin erkən tibbi reabiltasiyası və s. kimi məsələlər müzakirə olunub.

 

Vüqar Qurbanov vətəndaşların keyfiyyətli tibbi xidmətə əlçatanlılığının təmin edilməsi məqsədilə dövlət xəstəxanalarında çalışan tibb işçilərinin inkişaf etmiş səhiyyə ölkələrində təcrübə mübadiləsinə cəlb edilmələrinin əsas prioritetlərdən biri olduğunu bildirib.

 

O, ilkin səhiyyə xidmətinin inkişaf etdirilməsi istiqamətində Avropa ölkələrinin xüsusilə, Almaniyanın təcrübəsinin öyrənilməsinin önəmini vurğulayıb. Həmçinin xaricdə təhsil almış azərbaycanlı həkimlərin ölkə səhiyyəsinə qazandırılması istiqamətində işlərin görüldüyünü bildirib.

 

Christoph Reissfelder rəhbərlik etdiyi klinikanın TƏBİB-in tabeliyindəki Yeni Klinika ilə əməkdaşlıq edə biləcəyini qeyd edib, təcrübə mübadilələrinin mümkün perspektivləri barədə danışıb.

 

Daha sonra görüş qarşılıqlı əməkdaşlıq və perspektivlər ətrafında müzakirələrlə davam etdirilib.

 

Sonda ilkin əməkdaşlığa başlanılması qərara alınıb.

 

Qeyd edək ki, Heydelberq Universiteti Almaniya Federativ Respublikasının Heydelberq şəhərində yerləşir. 1386-cı ildə yaradılan bu ali təhsil müəssisəsi Almaniyada ən qədim universitetdir.