Elmi-Tədqiqat Tibbi Bərpa İnstitutunda Azərbaycan Tibb Universitetinin (ATU) fizioterapiya və reabilitasiya ixtisası üzrə təhsil alan tələbələrinin ixtisas dərslərinin və praktik təlimlərinin keçirilməsinə başlanılıb.

 

Bu barədə Aztibb.az-a institutdan məlumat verilib.

 

Bildirilib ki, təlimlər iki müəssisə arasında imzalanmış memorandum çərçivəsində həyata keçirilir.

 

Tələbələrlə görüşdə Elmi-Tədqiqat Tibbi Bərpa İnstitutunun direktoru Pərvin Əkbərov fizioterapiya və reabilitasiya sahəsinin ölkəmizdə getdikcə inkişaf etdiyini bildirib. O, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin səhiyyə xidmətlərinin daha da yaxşılaşdırılmasını əsas tutaraq birgə fəaliyyətindən danışıb.

 

Direktor ATU-nun tələbələrinin gələcəkdə ölkəmiz üçün peşəkar kadr kimi yetişərək Azərbaycanın bütün bölgələrində Reabilitasiya və Fizioterapiya mərkəzlərində aparıcı mütəxəssis kimi fəaliyyət göstərəcəklərinə əminliyini ifadə edib.

 

Pərvin Əkbərov fizioterapiya və reabilitasiyanın vacibliyindən bəhs edib, bu peşənin şərəfli bir sahə olduğunu deyib. O, təcrübə müddətində tələbələrə uğurlar arzulayıb.