Şəlalə Həsənova 2006-cı ildə Azərbaycan Tibb Universitetinin Pediatriya fakültəsini bitirdikdən sonra 2006-2007-ci illərdə Bakı şəhəri 5 saylı Birləşmiş Yoluxucu Uşaq Xəstəxanasında internatura təhsili alıb. O, 2014 və 2022-ci illərdə Həkimlərin Sertifikasiya İmtahanından uğurla keçib. Şəlalə Həsənova 2021-ci ildən Amerika Ürək Assosiasiyasının Pediatrik Qabaqcıl Həyata Dəstək (PALS) təlimi üzrə rəsmi instruktordur.

Aztibb.az Mərkəzi Gömrük Hospitalının komandasına yeni qoşulmuş Hospitalın Tibbi Yardımın Keyfiyyətinə Nəzarət Şöbəsinin rəisi, həkim-pediatr Şəlalə Həsənova haqqında məlumatları təqdim edir:

2007-ci ildən peşəkar həkim kimi fəaliyyətə başladıqdan sonra Şəlalə həkim müxtəlif özəl klinikalarda pediatr kimi çalışıb. O, 2020-2022-ci illərdə Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzində həkim-metodist kimi fəaliyyət göstərib. Dr.Şəlalə Həsənova daim öz üzərində işləyir, tibbin son nailiyyətlərini öyrənir, bilik və bacarıqlarını zənginləşdirir.

Belə ki, Şəlalə həkim 2014-cü ildə Türkiyə Cümhuriyyəti İstanbul Marmara Elmi-Tədqiqat Universitetində “Uşaqlarda allergik-immunoloji” kursunda, 2022-ci ildə Türkiyə Neonotoloji Dərnəyinin təşkilatçılığı ilə keçirilən “Yenidoğulmuşların reanimasiyada qidalanma” kursunda, 2014, 2016, 2017, 2020 və 2022-ci illərdə Azərbaycan Respublikası Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutunda pediatriya ixtisası üzrə kurslarda iştirak edib.

Həmçinin, 2019-cu ildə Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzində Neonatal və Pediatrik Mexaniki Ventilyasiya, Reanimasiya və Təcili Peadtrik Yardım, Təkmil Pediatrik Həyata Dəstək kurslarını keçib. O, 2021-ci ildə Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzində Səhiyyə Menecmenti üzrə kursun hər 2 modulunu bitirib.Dr.Şəlalə Həsənova 2022-ci ildə Türkiyənin Antalya şəhərində keçirilən XXIX Beynəlxalq Neonotoloji Konqres daxil olmaqla, bir çox beynəlxalq konfranslarda, konqreslərdə iştirak edib.