Elmi-Tədqiqat Tibbi Bərpa İnstitutunda aparılmış elmi işlərə dair konfrans keçirilib.

Tədbirdə institutun direktoru Pərvin Əkbərov müəssisənin əldə etdiyi elmi nailiyyətlərdən, müasir elmi istiqamətlər üzrə aparılan tədqiqatlardan və institutun strateji hədəflərindən danışıb. O, ölkəmizin işğaldan azad olunmuş ərazilərində mineral suların və balneoloji sərvətlərin öyrənilməsinin, Vətən müharibəsi qazilərinin müalicəsi üçün yeni reabilitasiya proqramlarının işlənilməsinin institutun qarşısında duran əsas vəzifələrdən olduğunu vurğulayıb.

Sonra institutda görülmüş elmi işlər haqqında hesabatlar dinlənilib.

İlk olaraq müəssisənin elmi işlər üzrə direktor müavini Sədaqət Hüseynova “Elektrostimulyasiya və pirimidin nucleotidlərinin Karpal tunel sindromlu xəstələrin müalicə və reabilitasiyasında tətbiqi" mövzusunda məruzə ilə çıxış edib.

Daha sonra Elşanə Mustafayeva "Üz sinirinin neyropatiyası olan xəstələrin reabilitasiyasında akupunktur elektrostimulyasiyanın və neyromidinlə mezoterapiyanın tətbiqi", Malik Bəylərov "Arterial hipertenziyada impulslu maqnit sahəsinin optimal müalicə metodikasının işlənib hazırlanması və vibroakustik terapiya ilə birgə tətbiqi" adlı məruzələrini təqdim ediblər. 

Konfransda, həmçinin Gülnara Həsənovanın "Revmatoid artritin kompleks müalicəsində krioterapiyanın naftalanla müştərək şəkildə tətbiqinin əhəmiyyəti" və A.Muradovun "Naftalan kurortu şəraitində psoriatik artritli xəstələrin tibbi reabilitasiyasında naftalan nefti və onun preparatlarının təsirinin öyrənilməsi” mövzusunda məruzələri dinlənilib.