Bu günlərdə V.Y.Axundov adına Elmi-Tədqiqat Tibbi Profilaktika İnstitutu 1 Saylı modul tipli xəstəxanaya köçürülüb.

Aztibb.az xəbər verir ki, institut yarandığı gündən Cəfər Cabbarlı küçəsi, 35 ünvanında yerləşib. Lakin institutun binasının əsaslı təmirə ehtiyacı olduğundan TƏBİB-in qərarına əsasən, 2021-ci ildən Elmi-Tədqiqat Tibbi Profilaktika İnstitutunun əməkdaşları müvəqqəti olaraq Elmi-Tədqiqat Tibbi Bərpa İnstitutunun bir hissəsinə yerləşdirilib və burada növbəli şəkildə öz fəaliyyətini davam etdirib.

Son günlərdə ölkəmizdə COVID-19-a yoluxmaların sayının kəskin şəkildə azalması ilə əlaqədar olaraq modul tipli xəstəxanalar öz fəaliyyətini dayandırıb. Mövcud vəziyyətlə əlaqədar olaraq TƏBİB-in qərarı ilə 13.04.2022-ci il tarixində Elmi-Tədqiqat Tibbi Profilaktika İnstitutu 300 yaxın elmi əməkdaşı ilə Cəlil Məmmədquluzadə küçəsi, 102 a ünvanında yerləşən 1 saylı modul tipli xəstəxanaya köçürülüb.

İnstitutun əsas hədəfi ən qısa zamanda İcbari Tibbi Sığorta Agentliyi nəzdində vətəndaşlara ambulator və stasionar xidmət göstərməkdir. İnstitutun kollektivi yüksək əhval-ruhiyyədə, qısa zamanda stasionar xidmətlərinə başlamaq niyyətindədir. Kollektivin ən böyük arzusu əsas binanın tez bir zamanda təmir olunması, öz binalarına köçmələri və bu ünvanda çoxşaxəli elmi fəaliyyətlərini və tibbi xidmətlərini davam etdirməkdir.

Qeyd edək ki, ölkəmizdə müxtəlif yoluxucu xəstəliklərə qarşı mübarizədə əvəzsiz rolu olan V.Y.Axundov adına Elmi-Tədqiqat Tibbi Profilaktika İnstitutun yaradılmasının bu il 100 illiyi tamam olacaq.