Konfransda TƏBİB-in İdarə Heyətinin sədri vəzifəsini icra edən Vüqar Qurbanov, akademik C.Abdullayev adına Elmi-Tədqiqat Kardiologiya İnstitutunun direktoru, tibb elmləri doktoru, professor Gülnaz Dadaşova, Bakı Sağlamlıq Mərkəzinin direktoru Asiman Həsənov, Səhiyyə Nazirliyinin nümayəndəsi Ülvi Mirzoyev, Respublikanın baş kardioloqu, AKC-nin və Ürək Damar Cəmiyyətinin sədrləri və başqa rəsmi şəxslər iştirak ediblər.

 

Çıxış edən Vüqar Qurbanov bildirib ki, dünyada olduğu kimi, ölkəmizdə də ürək-damar xəstəlikləri geniş yayılıb, hətta ölümün ilk əsas səbəbləri arasında ürək xəstəlikləri və insult yer alır. Bu da ürək-damar xəstəlikləri üzrə diaqnostik imkanların yaxşılaşmasını, xəstəliyin daha erkən aşkar edilməsinin zəruriliyini meydana çıxarır.

 

O, xəstəxanalarda maddi texiniki bazanın yaxşılaşdırılması, müasir standartlara cavab verən xidmətin təşkili üçün səhiyyə sahəsinin hərtərəfli dövlət qayğısı ilə əhatə olunduğunu qeyd edib. Eyni zamanda, V.Qurbanov ölkəmizdə icbari tibbi sığortanın tətbiq edilməsi ilə vətəndaşların ödənişsiz olaraq kardioloji müayinələrdən keçə bidiyini də vurğulayıb.

Gülnaz Dadaşova “XXI əsr: Xroniki ürək çatışmazlığında yeni nailiyyətlər” mövzusunda çıxış edərək, əvvəlki illərlə müqayisədə son dövrlər xəstəliyin müalicə və müayinəsində əldə edilən uğurlardan bəhs edib.

 

Daha sonra, “Ürək çatışmazlığının geriyə döndərilə bilən səbəbləri”, “HFpEF zamanı diaqnostika və müalicədə yanaşma”, “Kardioloji xəstələrdə kardioreabilitasiyanın önəmi”, “Perikarditlər – günün baxışı”, “Familial hiperlipidemiya və inclisiran”, “Kardiorenal sindrom–kardioloqun gözü ilə”, “TAVİ - Nə zaman və kimə?”, “Ürək amiloidozu – kimdə və nə səbəbdən?”, “Anadangəlmə ürək qüsuru: İkiçıxışlı sağ mədəcik”, “Səyrici aritmiyada hansı strategiyanı seçək - Azərbaycan reallığı nə deyir? və “Kardiovaskulyar effekti təsdiq edilmiş hipoqlikemik preparatlar zəmanəsi” mövzularında məruzələr dinlənilib.

Eyni zamanda, konfransda kardiologiyanın müasir problemləri müzakirə olunub.