Bakı Ali Neft Məktəbinin "Kimya mühəndisliyi" ixtisasının V kurs tələbəsi Rəşad Əhmədov ABŞ-ın 4 universitetinin doktorantura pilləsində tam təqaüdlə təhsil almaq imkanı qazanıb.

 

O, müraciət etdiyi Tuleyn Universiteti (Tulane University), Stevens Texnologiya İnstitutu (Stevens Institute of Technology), Roçester Universiteti (University of Rochester) və Konnektikut Universitetinin (University of Connecticut) hər birindən müsbət cavab alıb. Bu universitetlər Rəşad Əhmədovun tam təqaüdlə "Kimya mühəndisliyi" ixtisasının doktorantura pilləsində təhsil almaq müraciətini qəbul ediblər.

 

Azərbaycanlı tələbə ABŞ universitetləri arasında reytinqinə görə 34-cü pillədə yerləşən Roçester Universitetini seçib. Onun bu Universitetdən qazandığı təqaüdün məbləği 90 min ABŞ dolları təşkil edir.

 

Qeyd edək ki, Abşeron rayon Ceyranbatan qəsəbə 1 nömrəli tam orta məktəbin məzunu olan Rəşad Əhmədov 2017-ci ildə 677 balla Bakı Ali Neft Məktəbinə daxil olub.