Doğulduğu xəstəxanada yedizdirməyə cəhd olunsa da uşağın vəziyyəti daha da ağırlaşıb. Yemək borusunun anadangəlmə qüsuru ilə dünyaya gəlmiş körpənin əməliyyat olunmazsa, belə vəziyyətdə yaşaması mümkünsüz olub. Belə ki, körpənin yemək borusunun yuxarı ucu kor qurtarır, aşağı ucu ilə də nəfəs borusu arasında yol mövcud idi (Özofagus atreziyası+Traxeoözofagial fistula). 

 

1 günlük, çəkisi 3 kq olan körpənin yaşaya bilməsi üçün böyük və ağır cərrahi əməliyyat tələb olunub.

 

Aztibb.az xəbər verir ki, Mərkəzi Klinikada uşaq cərrahı Fuad Hüseynovun rəhbərliyi ilə icra olunmuş əməliyyat uğurlu keçib və körpə sağlamlığına qovuşub.

 

Əməliyyatla ilk öncə nəfəs borusu ilə yemək borusu arasındakı əlaqə kəsilib, yemək borusunun yuxarı və aşağı ucları sərbəstləşdirilərək və uc-uca tikilərək normal vəziyyətə gətirilib.

 

Körpə belə bir ağır əməliyyatdan sonrakı çətin günlərin öhdəsindən Mərkəzi Klinikanın professional neonotoloji reanimasiyanın həkimləri sayəsində uğurla gəlib.

 

O, 1 həftə sonra bütün uşaqlar kimi normal olaraq süd içməyə başlayıb, 10 gün sonra tam sağlam şəkildə Naxçıvana yola salınıb.