Aztibb.az xəbər verir ki, əlilliyi olan şəxslərin Peşə-Əmək Reabilitasiyası Mərkəzinin direktoru Rəhilə Həsrətova tədbiri giriş sözü ilə açaraq bildirdi ki, sağlam qidalanma və fiziki aktivlik gənc nəslin inkişafında vacib rol oynayır. O, fiziki aktivlik mövzunda keçirilən maarifləndirmə tədbirlərinin əhəmiyyətini xüsusilə vurğuladı. Bakı şəhər Gənclər və İdman Baş İdarəsinin sektor müdiri Zamin Əhmədov fiziki aktivliyi təbliğ etmək, bir çox xəstəliklərin əsas risk faktoru olan fiziki passivlikdən uzaq olmağın vacibliyini qeyd etdi.

 

Səhiyyə Nazirliyinin İctimai Səhiyyə və İslahatlar Mərkəzinin nümayəndəsi Gülnarə Cəfərova çıxış edərək, sağlam həyat tərzi keçirməyin və fiziki aktiv olmağın əhəmiyyəti barədə ətraflı məlumat verdi, qeyri-sağlam qidalanmanın artıq çəkinin artmasına səbəb olduğunu, bunun da bilavasitə qeyri-infeksion xəstəliklərin yaranmasına təkan verdiyini nəzərə çatdırdı. O vurğuladı ki, mütəmadi fiziki aktivlik ürək-damar xəstəlikləri, II tip şəkərli diabet, bir sıra xərçəng xəstəlikləri, piylənmə, depressiya və sümüklərin kövrəkləşməsinin qarşısını alır. Həmçinin sağlamlıq naminə fiziki aktivliyi vərdişə çevirməyin vacibliyi, gün ərzində ən azı 60 dəqiqə fiziki aktivliyə vaxt ayırmağın zəruriliyi, eyni zamanda yaxın məsafələrə piyada getməyin, pilləkənlə qalxıb-enməyə üstünlük verməyin, gün ərzində televiziya və kompüter qarşısında keçirilən vaxtı 2 saatadək azaltmağın əhəmiyyətini nəzərə çatdırdı. Gənclərə gündəlik fiziki aktiv hərəkətlər etməyi tövsiyə edən Gülnarə Cəfərova onlara aerobika, əzələ və sümükləri möhkəmləndirən hərəkətlər barədə məlumat verdi.

 

Yekunda iştirakçıları maraqlandıran suallar cavablandırıldı və sağlam həyat tərzinə dair faydalı tövsiyələr nəzərə çatdırıldı.