Çin yoluxucu xəstəliklərin profilaktikasında və müalicəsində, eləcə də ictimai səhiyyə sahəsində fövqəladə vəziyyətə yanaşmada ənənəvi Çin təbabətinin rolunu artırmağı planlaşdırır.
Aztibb.az Sinxua agentliyinə istinadla xəbər verir ki, Çin Xalq Respublikasının Dövlət Şurasının bu yaxınlarda açıqladığı planda bu barədə bildirilir.
14-cü beşillik dövründə (2021-2025-ci illər) ənənəvi Çin təbabətinin inkişaf planında COVID-19 epidemiyasının profilaktikasına və nəzarətinə ənənəvi Çin təbabətinin verdiyi mühüm töhfə yüksək dəyərləndirilir, müvafiq qanunların və normativ aktların işlənib hazırlanmasında, həmçinin onlara düzəlişlər edilərkən Çin və Qərb təbabətləri metodlarının uyğunluğunu daxil etmək imkanının öyrənilməsi və ənənəvi Çin təbabətinin müalicə üzrə imkanlarının artırılması təklif olunur.
Sənəddə vurğulanır ki, ənənəvi Çin təbabəti ilə məşğul olan aparıcı xəstəxanaların təcrübəsi ölkənin əyalət səviyyəsində bütün inzibati vahidlərində yoluxucu xəstəliklərin profilaktikası və müalicəsi üzrə ənənəvi Çin təbabəti milli bazasının yaradılmasında istifadə olunacaq.
Planda bildirilir ki, ənənəvi Çin təbabəti ilə məşğul olan bütün dövlət xəstəxanaları, eləcə də Çin və Qərb təbabəti ilə məşğul olan aparıcı dövlət xəstəxanaları yüksək hərarəti olan xəstələrin qəbulu üçün ambulatoriyaya sahib olmalı və yoluxucu xəstəliklər, təcili yardım, ağır xəstəliklər, respirator xəstəlikləri və laborator analizləri şöbələrinin tikintisini artırmalıdırlar.