1993-cü il təvəllüdlü Gülnar Axundzadə Kliniki Tibbi Mərkəzdə infeksionist, 1986-cı il təvəllüdlü Günel Əliyeva isə təcili və təxirəsalınmaz tibbi yardım həkimi kimi fəaliyyətə başlayıb.

 

Bu barədə Aztibb.az-a Mərkəzdən məlumat verilib.

 

Bildirilib ki, həkim-infeksionist Gülnar Rövşən qızı Axundzadə 2010-2015-ci illərdə Azərbaycan Tibb Universitetinin Tibbi-profilaktika fakültəsində təhsil alıb. 2015-2019-cu illərdə Kliniki Tibbi Mərkəzdə rezidentura keçib. 2017-2019-cu illərdə Türkiyənin Ondokuz Mayıs Universitetində yoluxucu xəstəliklər üzrə təcrübədə olub. O, 2019-2020-ci illərdə təyinatı üzrə Şəmkir Rayon Mərkəzi Xəstəxanasında həkim-infeksionist işləyib. 2020-ci ilin dekabr ayında Ümumdünya Səhiyyə Təşkilatının və UNİCEF-in COVID-19-la bağlı layihələrində həkim-təlimçi olaraq fəaliyyət göstərib.

Günel Nazim qızı Əliyeva isə 2011-ci ildə Azərbaycan Tibb Universitetinin Pediatriya fakültəsini bitirib. 2012-2013-cü illərdə Mədəniyyət və Turizm Nazirliyinin nəzdində yaradılmış Türkan Mədəniyyət Mərkəzində Təcili tibbi yardım kursunun rəhbəri vəzifəsində çalışıb. 2013-2017-ci illərdə 3 saylı Şəhər Klinik Xəstəxanasında Reanimatologiya-anesteziologiya ixtisası üzrə rezidentura təhsili alıb. O, 2017-2021-ci illərdə 11 saylı Təcili və Təxirəsalınmaz Tibbi Yardım stansiyasında həkim anestezioloq-reanimatoloq vəzifəsində çalışıb.