Azərbaycan Kardiologiya Cəmiyyəti, Azərbaycan Ürək-Damar Cərrahiyyəsi Cəmiyyəti, Türkiyə Ürək və Damar Cərrahiyyəsi Cəmiyyəti və Türkiyə Kardiologiya Cəmiyyətinin birgə təşkilatçılığı ilə ürəyin aorta qapağının xəstəliklərinə həsr olunmuş "A-dan Z-yə AORTA" konfransı keçirilib. Tədbirdə Azərbaycan, Türkiyə və İsraili təmsil edən 320 kardioloq iştirak edib.
Aztibb.az xəbər verir ki, tədbirin açılış mərasimində çıxış edən Azərbaycan Kardiologiya Cəmiyyətinin İnvaziv işçi qrupunun sədri Üzeyir Rəhimov, Azərbaycan Ürək-Damar Cərrahiyyəsi Cəmiyyətinin sədri Kamran Musayev, Türkiyə Kardiologiya Cəmiyyətinin katibi Ertuğrul Okuyan, Türkiyə Ürək və Damar Cərrahiyyəsi Cəmiyyətinin katibi Şahin Şenay, Milli Məclisin Səhiyyə komitəsinin sədr müavini Rəşad Mahmudov aorta qapaq xəstəliklərinin diaqnostikası, müalicəsində yeniliklərin olduğunu və bu sahədə təcrübə mübadiləsinin vacibliyini diqqətə çatdırıblar. Çıxış edənlər konfransın həm kardioloqlar, həm də kardiocərrahlar üçün faydalı olacağını və öyrəndikləri yenilikləri praktikada tətbiq edəcəklərinə inandıqlarını bildiriblər.
Sonra tədbir panel müzakirələrlə davam edib. Emin Kərimlinin "Aorta qapaq anatomiyası", Yasmin Rüstəmovanın "Aorta qapaq görüntülənməsi", Elnur İsayevin "Aorta stenozunun patofiziologiyası", Cəmil Babayevin "Aorta çatışmazlığı", Qalib İmanovun "Anadangəlmə aorta qapaq xəstəlikləri", David Planerin "Mürəkkəb TAVİ halları", Mesut Demirin "TAVİ ağırlaşmaları" və başqalarının müxtəlif mövzularda məruzələri dinlənilib, mövzular ətrafında müzakirələr aparılıb.
