Sağlamlıq imkanları məhdud uşaqların etibarlı fiziki-mənəvi inkişafı ilə yanaşı sosial təminatı, səmərəli tibbi-sosial reabilitasiya xidmətləri ilə əhatə olunması Prezident İlham Əliyevin sosial inkişaf strategiyasında mühüm prioritetlərdən biridir. Bu tədbirlərin davamı olaraq Dövlət başçısının göstərişi ilə son illər reabilitasiya sistemi müasir tələblərə uyğun qurulur. 2019-2021-ci illərdə Əmək və Əhalinin Sosial Müdafiəsi Nazirliyinin 12 reabilitasiya və sosial xidmət müəssisəsi əsaslı təmir olunaraq yenidən qurulub, ən müasir avadanlıqlarla təchiz edilərək istifadəyə verilib.

 

Nazirliyin 1 və 2 saylı reabilitasiya mərkəzlərində sağlamlıq imkanları məhdud uşaqların səmərəli reabilitasiya xidmətləri ilə təmin olunmaları üçün ən müasir tələblərə uyğun şərait yaradılıb. Ötən ilin dekabr ayında Qəbələdə il ərzində 1000-dən çox sağlamlıq imkanları məhdud uşağa reabilitasiya xidmətləri göstərəcək Uşaq Reabilitasiya Mərkəzi istifadəyə verilib.

 

Yaxın aylarda isə Şəmkirdə daha belə bir mərkəzin açılması planlaşdırılır. Ümumilikdə, gələcəkdə uşaq reabilitasiya mərkəzləri şəbəkəsinin daha da genişləndirilməsi nəzərdə tutulur.

 

Hazırda DTSERA-nın müasir tələblərə uyğun qurulmuş 3 Uşaq Reabilitasiya Mərkəzi fəaliyyət göstərir. Həmin Mərkəzlərdə il ərzində bir hissəsi autizm sindromlu uşaqlar olmaqla, ümumilikdə, 4 minədək sağlamlıq imkanları məhdud uşaq tibbi, sosial reabilitasiya tədbirləri ilə əhatə olunur. Həmin uşaqlar peşəkar psixoloq, əmək terapevti, özünəqulluq və loqoped xidmətləri ilə təmin olunurlar. Eyni zamanda onların valideynləri ilə maarifləndirici işlər aparılır.

 

Agentliyin 1 saylı Uşaq Reabilitasiya Mərkəzində autizm üzrə məşhur amerikalı mütəxəssis, “Child with a Future” fondunun təmsilçisi Bill Piters reabilitasiya xidmətləri göstərilən autizm sindromlu sağlamlıq imkanları məhdud uşaqlarla motivasiya məqsədi daşıyan sosial-psixoloji seanslar təşkil edilib, həmçinin reabilitasiya mərkəzlərinin əməkdaşları üçün təlim keçirilib.