TƏBİB-in təşkilatçılığı ilə ADA Universiteti və ATU-nun Onkoloji Klinikası ilə “Süd vəzisi xərçənginin diaqnostikasında süni intellektin tətbiqi” mövzusuna həsr olunmuş görüş keçirilib.

 

Görüşdə çıxış edən TƏBİB-in Daxili nəzarət və monitorinq departamentinin Strategiya və layihələrin icrasına nəzarət şöbəsinin müdiri, t.e.d. Emil İskəndərov süd vəzisi xərçənginin proqnozunda erkən aşkarlanmanın və bu sahədə beynəlxalq təcrübədə istifadə olunan innovativ üsulların rolunun önəmini vurğulayıb.

 

TƏBİB-in Tibbi fəaliyyətin təşkili departamentinin müdiri Teymur Mirzəbəyli çıxışında süni intellektin diaqnostika ilə yanaşı xəstəliyin müalicə proqramlarında da istifadə oluna biləcəyini qeyd edib.

 

Sonra Strategiya və layihələrin icrasına nəzarət şöbəsinin mütəxəssisi Sevda Civişova layihənin məqsədi və həyata keçirilməsi üçün görüləcək işlər barədə təqdimatla çıxış edib.

 

ADA Universitetinin İT Departamentinin dosenti Camaləddin Həsənov isə süni intellektin səhiyyə sahəsində tətbiqi imkanlarını, bu zaman tələb olunan resursları və gələcək perspektivlərindən bəhs edib.

 

Daha sonra ATU-nun Onkoloji Klinikasının mammoloq-onkoloqu, dosent Həqiqət Vəliyeva süd vəzisi xərçəngi xəstəliyindən əziyyət çəkənlərin statistikasının və diaqnostikanın təkmilləşdirilməsi istiqamətində süni intellektin praktiki və kliniki əhəmiyyətindən danışıb.

 

Sonda görüş iştirakçıları layihənin həyata keçirilməsi istiqamətində gələcəkdə görüləcək işləri müzakirə ediblər.