Riqada Avropanın 22 ölkəsinin onkoloqlarının “Xərçənglə mübarizədə bərabərlik haqqında” mövzusunda ikigünlük konqresi keçirilib.
Aztibb.az xəbər verir ki, konqresin açılış mərasimində Avropa İttifaqının səhiyyə və qida təhlükəsizliyi üzrə komissarı Stella Kiriakidis, Avropa Komissiyasının İctimai Səhiyyə Direktorluğunun rəhbəri Con Rayan, Melanoma Xəstələrinin Avropa Şəbəkəsinin təsisçisi Bettina Rill, Baltikyanı ölkələrin səhiyyə nazirləri və başqaları çıxış ediblər.
Tədbirdə onkoloji xəstəliklərin diaqnostikasında, müalicəsində və ən yeni dərman preparatlarına əlçatanlıqda qeyri-bərabərliyin qarşısının alınması yolları müzakirə edilib.
“Onkoalianse” təşkilatının idarə heyətinin üzvü Olqa Valtsiņya bildirib ki, Avropanın onkoloji xəstəliklərlə bağlı təşkilatları ilk dəfədir bir araya gələrək xərçəng xəstəliyinin müalicəsində bərabərsizlikləri aradan qaldırmaq məqsədilə aydın tələblər irəli sürüblər. Vurğulanıb ki, Qərbi və Şərqi Avropa ölkələri arasında müqayisələr onkoloji xəstəliklərin müalicəsində qeyri-bərabərliyin olduğunu açıq şəkildə göstərir. Bunun səbəbi insanların maddi təminatı ilə yanaşı, onkoloji xəstələrin müalicəsi və onlara qulluq sistemində ağır problemlərin olmasıdır.
Tədbir iştirakçıları “Xərçəngin müalicəsində qeyri-bərabərliyin azaldılması üçün 10 addım” adlı müraciət imzalayıblar. Müraciət Avropa Komissiyasına, Avropa Parlamentinə və Avropa İttifaqı ölkələrinin Səhiyyə nazirliklərinə göndəriləcək.
