Azərbaycan Tibb Universitetinin (ATU) Tədris Terapevtik Klinikasında cari məsələlərin müzakirəsi və həllinə dair toplantı keçirilib. Toplantıda klinikada olan problemlər və cari məsələlərdən danışılıb, onların həlli istiqamətində müzakirələr aparılıb.

İclası açan Tədris Terapevtik Klinikanın direktoru, əməkdar elm xadimi, professor Surxay Musayev professor Sahib Musayevi 70 illik yubileyi münasibətilə ürəkdən təbrik edərək Azərbayan Tibb Universitetinin rektoru professor Gəray Gəraybəylinin adından Fəxri Fərmanı təqdim edib. Öz növbəsində professor Sahib Musayev ATU-nun rektoru professor Gəray Gəraybəyliyə və klinikanın direktoru professor Surxay Musayevə Azərbaycan Tibb Universitetində və Tədris Terapevtik Klinikada yaradılan şəraitə və təbrikə görə öz təşəkkürünü bildirib.

Ardınca gündəliyə uyğun olaraq klinikanın müalicə işləri üzrə direktor müavini Fəridə Hacıyeva ötən iki həftə ərzində ambulator və stasionar xəstə qəbulu və klinikanın müalicə işlərinin yekunlarına dair hesabatla çıxış edib. O, son iki həftə ərzində müəssisənin tibbi fəaliyyəti və mövcud çətinliklər barədə də məlumat verib.

Dinlənilən hesabatdan sonra çıxış edən prof. Surxay Musayev klinikada uzun müddətli fasilədən sonra fəaliyyətini bərpa etmiş ürək damar mərkəzindən danışıb və invaziv kardiologiya üzrə yeni həkim Mehriban İskəndərovanı klinika əməkdaşlarına təqdim edib. Qeyd olunub ki, yeni fəaliyyətə başlamasına baxmayaraq mərkəzdə artıq üç xəstə əməliyyat olunub. İcbari Tibbi Sığorta Agentliyi tərəfindən göndərilən xəstələrin birində angioqrafiya, ikisində isə stend qoyma əməliyyatı uğurla həyata keçirilib.

Professor əməliyyatların keçirilməsində göstərdikləri dəstəyə görə İcbari Tibbi Sığorta Ağentliyinin, TƏBİB-in rəhbərliyinə və ATU-nun Tədris Cərrahiyyə Klinikasının invaziv kardioloqlarına da öz təşəkkürünü bildirib.

Bundan əlavə o, kardiologiya şöbəsinin avadanlıqlarının təmir olunaraq şöbənin yenidən qurulduğunu və gənc kardioloqların da işə cəlb olunacağını vurğulayıb.

S.Musayev klinikada mövcud olan problemlərə eləcə də, bəzi əməkdaşların özəl klinikalarda çalışması məsələlərinə də toxunub. ATU rəhbərliyi ilə bu məsələnin geniş müzakirə olunduğunu deyən direktor, yaxın zamanda bununla bağlı müəyyən tədbirlər həyata keçiriləcəyini də qeyd edib.

Sonda klinikanın direktoru, professor Surxay Musayev klinikanın bütün əməkdaşlarını qarşıdan gələn Novruz bayramı münasibətilə təbrik edib, hər birinə cansağlığı, xoşbəxtlik və işlərində uğurlar arzulayıb.