Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyevanın və həkim-rezidentlərinin iştirakı ilə "Hemostaz" mövzusunda seminar keçirilib.

 

Seminarda çıxış edən Kardiologiya şöbəsinin həkim-rezidenti Əli Balakişiyev hemostazın mərhələləri, aPTZ və protrombin zamanı antiaqreqant, antikoagulant dərmanların təsiri, hemofiliya, koaqulasiya və fibrinolitik sistem barədə ətraflı məlumat verib.

 

Həkim bildirib ki, hemostaz sistemi damarlarda axan qanın maye halında qalmasını və qan damarları zədələndikdə qanaxmanın qarşısının alınmasını təmin edən bioloji bir sistemdir. Onun sözlərinə görə, hemostaz sistemi şərti olaraq 2 mexanizmə bölünür: "Hemostaz sistemi laxtalanma və ya prokoqaqulyant sistemi, əks və ya antikoaqulyant sistemi olmaqla 2 mexanizmə bölünür. Bu mexanizmlərdən əlavə, qan damarının zədələndiyi hissədə yaranan qan laxtasını əritmək üçün daha bir ferment sistemi - fibrinoliz sistemi fəaliyyət göstərir. Bu üç mexanizmin qarşılıqlı əlaqəsi, bütövlükdə qanın laxtalanma vəziyyətini xarakterizə edir"- deyə o, bildirib.

 

Geniş müzakirə şəraitində keçən seminarda rezidentlər öz fikirlərini bölüşüb, onları maraqlandıran suallara aydınlıq gətirilib.