Azərbaycan Tibb Universitetində (ATU) Təbriz Tibb Elmləri Universitetinin İnnovasiya Mərkəzinin nümayəndələri ilə görüş keçirilib.

Bu barədə Aztibb.az-a ATU-dan məlumat verilib.

Görüşdə hər iki  təhsil müəssisəsinin rəhbərləri arasında qarşılıqlı əməkdaşlıq məsələləri müzakirə olunub.

ATU-nun rektoru, professor Gəray Gəraybəyli rəhbərlik etdiyi müəssisə ilə Təbriz Tibb Elmləri Universiteti arasındakı mövcud saziş əsasında uğurlu fəaliyyətdən danışıb. O, artıq bir neçə ildir ki, iki universitetin aktiv şəkildə əməkdaşlıq etdiyini, həm tələbə, həm də akademik heyət üzvləri arasında mübadilə aparıldığını bildirib. Universitetlər arasında anlaşma memorandumuna əlavə olaraq innovasiya və elmi tədqiqatların birgə aparılmasına dair yenə sənədin hazırlandığını deyən rektor bu sənədin qarşılıqlı əməkdaşlıqda yeni imkanlar açacağına əminliyini ifadə edib.

Təbriz Tibb Elmləri Universitetinin İnnovasiya Mərkəzinin direktoru, professor Soodabeh Davaran innovasiya və elmi tədqiqatlara dair hazırlanan sənədin iki universitet arasında elmi əlaqələrin gücləndirilməsi baxımından mühüm əhəmiyyət kəsb etdiyini vurğulayıb. Müasir dünyada təhsilin inkişafının yeni texnologiyalar, yeni məhsulların istehsalı ilə yanaşı addımladığını deyən direktor bildirib ki, pandemiya dövründə tibb sahəsində innovativ yeniliklərin önəmi bir daha ortaya çıxıb. Professor iki universitet arasında yeni əməkdaşlığın nanotexnologiyalar, əczaçılıq sahəsində də birgə elmi tədqiqatların aparılmasına imkan verəcəyini qeyd edib.

Sonra tərəflər arasında qarşılıqlı əlaqələrin gücləndirilməsi, müştərək elmi araşdırmaların aparılması, ortaq tədbirlərin təşkili və digər məsələlərlə bağlı müzakirələr aparılıb.

Görüşdə Təbriz Tibb Elmləri Universitetinin İnnovasiya Mərkəzinin elmi işçisi,  Dr. Aziz Eftikhiari, ATU-nun beynəlxalq əlaqələr üzrə prorektoru, dosent Orxan İsayev, elmi işlər üzrə prorektoru, dosent Rauf Bəylərov, Əczaçılıq texnologiyası və idarəçiliyi kafedrasının müdiri, professor Məhbubə Vəliyeva, Beynəlxalq əlaqələr şöbəsinin müdiri, dosent Müşfiq Hacıyev, Əczaçılıq fakültəsinin dekanı Fərəh Mədətli, Mətbuat xidmətinin rəhbəri Günel Aslanova, eləcə də Bakı Dövlət Universitetinin Biofizika və biokimya kafedrasının müdiri, professor Rövşən Xəlilov və "Biyan Products" MMC-nin direktoru Səbinə İsmayılova iştirak ediblər.

Qeyd edək ki, iki gün davam edən səfər zamanı Təbriz Tibb Elmləri Universitetinin İnnovasiya Mərkəzinin nümayəndələri ATU-nun klinikaları, müxtəlif kafedraları ilə tanış olub, Əczaçılıq fakültəsi və laboratoriyalarını ziyarət ediblər.