“SARS-CoV-2 (COVID-19) kompleks diaqnostikasına müasir yanaşmalar” mövzusunda beynəlxalq elmi konfransda iştirak üçün Azərbaycanda səfərdə olan Florence Nightingale Xəstəxanalar Qrupunun həkim-infeksionisti Feride Gökçe Demir konfrans çərçivəsində Mərkəzi Gömrük Hospitalının Reanimasiya və İntensiv Terapiya şöbəsinin həkimləri ilə görüşüb.
Aztibb.az xəbər verir ki, görüşdə Mərkəzi Gömrük Hospitalın baş həkiminin müavini Bəxtiyar Musayev iştirak edib.
Görüşdə hospitalın Reanimasiya şöbəsində COVID-19 xəstəliyindən müalicə olunan ağır və kiritik ağır vəziyyətli xəstələrin müalicə taktikası, istifadə olunan tibbi protokollar və bu müddətdə əldə edilmiş təcrübə haqqında geniş müzakirələr aparılıb.
Dr.Feride Gökçe Demir Florence Nightingale Xəstəxanalar Qrupuna daxil olan müalicə müəssisələrinin COVID-19 diaqnozlu xəstələrin müalicəsində böyük təcrübəsinin olduğunu da vurğulayıb. O, istifadə olunan tibbi protokollar və müalicə taktikasında oxşarlığı xüsusilə qeyd edib.
Tədbirdə, həmçinin ağır və kritik ağır vəziyyətdə olan COVID-19 xəstələrinin müalicəsində EKMO cihazının və müxtəlif efferent müalicə üsullarının effektivliyi barədə fikir mübadiləsi aparılıb.
