Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin və Mərkəzi Gömrük Hospitalının birgə təşkilatçılığı ilə "Pediatrik immunologiya və infeksion xəstəliklər" mövzusunda keçirilən beynəlxalq elmi konfrans öz işini davam etdirib.

 

Konfransın ikinci günündə Mərkəzi Gömrük Hospitalının rəisi Elman Məmmədov çıxış edərək uşaq xəstəliklərinin erkən diaqnostika və müalicə işinin təşkili sahəsində beynəlxalq elmi tədqiqatların nəticələrinin araşdırılması, beynəlxalq təcrübənin öyrənilməsi, eləcə də yerli və xarici mütəxəssislərarası təcrübə mübadiləsinin təmin edilməsinin əhəmiyyətini qeyd edib.

 

Mərkəzi Gömrük Hospitalının həm maddi-texniki baza, həm də yüksəkixtisaslı kadr potensialı cəhətdən uşaq sağlamlığının qorunması istiqamətində geniş təcrübəyə malik olduğunu deyən E.Məmmədov konfransın yerli və beynəlxalq təcrübənin öyrənilməsi baxımından önəmli bir platforma rolunu oynayacağına inamını ifadə edib.

 

O, çıxışının sonunda beynəlxalq tədbirin işinə uğurlar arzulayıb, hər kəsi interaktiv müzakirələrdə aktiv iştiraka dəvət edib.

 

Daha sonra konfransda Mərkəzi Gömrük Hospitalının Pediatriya və neonatologiya şöbəsinin rəisi, pediatr, neonatoloq-reanimatoloq Telman Aytayev və Ege Universiteti Tibb fakültəsinin pediatr-immunoloqu Neslihan Karacanın moderatorluğu ilə “Limfoadenopatiyalı uşaqlara yanaşma” paneli üzrə çıxışlar dinlənilib.

 

Konfrans günün ikinci yarısında Səhiyyə Nazirliyinin baş neonatoloqu, ETMGİ-nin Neonatal reanimasiya şöbəsinin müdiri Rüstəm Hüseynov və Ankara Universiteti Tibb fakültəsinin neonatoloq-reanimatoloqu Emel Okulunun moderatorluğu ilə “İnfeksiyaya nəzarət tədbirləri” paneli ilə, eləcə də Mərkəzi Klinik Xəstəxananın Pediatriya və neonatologiya şöbəsinin müdiri, pediatr-neonatoloq Sevda Əsədova və İstanbul Mədəniyyət Universiteti Tibb fakültəsinin professoru Fahrı Ovalının moderatorluğu ilə “İnfeksiyalara müasir yanaşma” paneli ilə öz işini davam etdirib.

 

"ZOOM" platforması üzərindən 500 nəfərədək həkimin onlayn iştirak etdiyi tədbirin ikinci günündə 3 paneldə yüksəkixtisaslı mütəxəssislər tərəfindən ümumilikdə 8 məruzənin təqdim edilməsi və konfransın Mərkəzi Gömrük Hospitalının rəsmi Facebook səhifəsi üzərindən canlı yayımlanması nəzərdə tutulub.

 

Qeyd edək ki, beynəlxalq elmi konfrans Azərbaycan Respublikası Səhiyyə Nazirliyinin “Davamlı tibbi təhsil üzrə elm və tədris tədbirlərinin akkreditasiya Qaydaları“ əsasında akkreditasiya olunaraq 16 DTT balı ilə qiymətləndirilib.