Sınıq Qəlb Sindromu (Broken Heart Syndrome) güclü stres nəticəsində yaranan müvəqqəti ürək xəstəliyidir.

 

Aztibb.az Azərbaycan Kardiologiya Cəmiyyətinə istinadla xəbər verir ki, bu zaman ürək bir neçə həftə və ya ay sonra öz normal fəaliyyətinə qayıdır. Lakin bu ciddi fəsadlara da yol aça bilər. Bu xəstəlik əsasən yaxın ailə üzvünü itirərkən və daha çox qadınlarda baş verən ürək patologiyasıdır.

 

Əlamətləri kəskin miokard infarktının əlamətlərinə bənzəyir. Xəstə infrakt keçirdiyini düşünür çünki döş qəfəsində güclü ağrı və nəfəs darlığı hiss edir. Güclü stresin nəticəsi olaraq ürəyin sol mədəciyinin bir hissəsi qanı qovma funksiyasını (pumping function) itirir. Lakin xəstə müayinə olunduğu zaman ürək damarlarında əhəmiyyətli darlıq müşahidə olunmur.

 

Bu xəstəlik, həmçinin stres kardiomiopatiyası, apikal balonlaşma, takotsubo kardiomiopatiyası da adlandırılır.

 

Xəstəlik ilk dəfə 1990-cı ildə Yaponiyda təsvir olunub və müayinələr zamanı məlum olub ki, güclü stresin təsiri altında ürəyin sol mədəciyinin zirvə hissəsi sistola zamanı balonlaşaraq yapon balıqçılarının istifadə etdikləri “Tako Tsubo “ osminoq qabını xatırladır.