Azərbaycan Tibb Universitetində Rusiya Elmi-tibbi Terapevtlər Cəmiyyəti ilə birlikdə təşkil edilmiş “Daxili xəstəliklər üzrə dialoqlar” beynəlxalq konfransı keçirilib.
Universitetin mətbuat xidmətindən verilən məlumata görə, Azərbaycan Tibb Universitetinin rektoru, professor Gəray Gəraybəyli konfransın yeni növ koronavirus (COVID-19), postkovid sindromu, kardiologiya və revmatologiya, allerqologiya və digər mövzuları əhatə etdiyini bildirib.
Professor qeyd edib ki, XXI əsrdə daxili xəstəliklərin artımı ürək-damar xəstəlikləri və xroniki ağciyər problemlərinin çoxalmasına səbəb olub: “XXI əsr yeni xəstəlik olan və dünyada 6 milyon insan itkisinə səbəb olan COVID-19 pandemiyasını gətirdi. Pandemiya dövründə yanaşı xəstəlikləri olanların infeksion xəstəliyini daha ağır keçirdiyi aşkarlandı. Müasir dövrdə 65 yaşdan yuxarı xəstələrin əksəriyyətinin azı üç xəstəliyi olur, bu da yaşlılarda ölüm riskini artırır. Konfrans da məhz komorbid - birgə xəstəliklərin patologiyalarına həsr olunub”.
Rusiya Elmlər Akademiyasının akademiki, Rusiya Elmi-tibbi Terapevtlərin Cəmiyyətinin rəhbəri Anatoli Martınov elmi-praktiki konfransın qarşılıqlı əlaqələrin genişləndirilməsi, təcrübə mübadiləsi baxımından böyük əhəmiyyət daşıdığını bildirib.
Konfransda Rusiya Elmi-tibbi Terapevtləri Cəmiyyəti adından Azərbaycan Tibb Universitetinin rektoru, professor Gəray Gəraybəyli, elmi işlər üzrə prorektoru Rauf Bəylərov və universitetin elmi-tibbi koordinatoru Sevil Əsədova Rusiya Elmi-tibbi Terapevtləri Cəmiyyəti ilə aktiv əməkdaşlıq və iki ölkə arasında elmi əlaqələrin möhkəmlənməsi işinə verdikləri töhfəyə görə “İbn Sina” ordeni ilə təltif olunublar.
Konfransın panel iclaslarında Azərbaycanın və Rusiyanın müxtəlif tibbi-elmi müəssisələrinin əməkdaşları “COVID-19 dünən, bu gün və sabah”, “Vərəm və COVID-19 infeksiyası”, “Osteoartrozun müasir konsepsiyası”, “Sistemik birləşdirici toxumun xəstəlikləri ilə əlaqəli vaskulitlər”, “Terapevtin praktikasında komorbidlik”, “Hipertrofik kardiopatiya: diaqnostika, müalicə və müasir cari tövsiyələr”, “Prediabet: problemlər və perspektivlər” və “Yoluxucu və qeyri-infeksion xəstəliklərin klinikasında müasir enterosorbsiya” mövzularında məruzələr dinlənilib.