Mərkəzi Gömrük Hospitalının mama-ginekoloqu beynəlxalq elmi konfransda çıxış edib.

Aztibb.az xəbər verir ki, 24 fevral 2022-ci il tarixində Mərkəzi Gömrük Hospitalı Mamalıq-ginekologiya şöbəsinin rəisi, t.f.d., mama-ginekoloq Təranə Bayramova Azərbaycan Tibb Universiteti və Malatya İnönü Universiteti Qaraciyər nəqli institutunun birgə təşkilatçılığı ilə "VII Bakı-Malatya, Orqan Transplantasiya Günləri" adlı Beynəlxalq Elmi Konfransın II panelində “Qaraciyər transplantasiyası olunmuş resipiyent qadınlarda hamiləlik xüsusiyyətləri” mövzusunda təqdimatla çıxıb edib.

100-ə yaxın dinləyicinin ZOOM platforması üzərindən onlayn olaraq iştirak etdiyi konfransda Təranə Bayramova transplantasiyanın aktuallığı, qaraciyər xəstəlikləri və nəql keçirmiş qadınlarda fertillik problemləri, hormon profili, nəqlsonrası hamiləlik vaxtının düzgün seçilməsi, hamiləlik planlaşdırılması və kontrasepsiya, hamiləliyin idarə olunması, hamiləlik ağırlaşmaları, hamiləlik və südvermə dövründə immunosupressivlərin istifadəsi barədə ətraflı məlumat verib.

Təranə Bayramova çıxışının soununda klinik tövsiyələr vermiş və konfrans iştirakçılarının çoxsaylı suallarını cavablandırıb. Həmçinin, tədbirdə Azərbaycanda transplantologiya sahəsinin mövcud vəziyyəti, bu sahədə həyata keçirilən unikal əməliyatlar barədə məlumatlar verilib.