Azərbaycan Tibb Universitetində (ATU) “Laparoskopik cərrahiyyə: imkanları və üstünlükləri” mövzusunda beynəlxalq elmi-praktiki simpozium keçirilib.

Respublika Müalicə və Diaqnostika Mərkəzi, Azərbaycan Endoskopik Laparoskopik Cərrahlar Cəmiyyəti  və Türkiyənin üç tibbi dərnəyinin təşkilatçılığı ilə keçirilən tədbirdə bu sahədə dünyanın müxtəlif ölkələrində tətbiq olunan müalicə metodları, yeniliklər barədə məlumat verilib.

Tədbirdə çıxış edən Azərbaycan Endoskopik Laparoskopik Cərrahlar Cəmiyyətinin rəhbəri, professor Müsfiq Həsənov, Respublika Diaqnostika Mərkəzinin baş həkimi Könül Xəlilova və Türkiyənin Endoskopik Laparoskopik Cərrahiyyə Dərnəyinin başqanı, professor Cavit Avcı beynəlxalq simpoziumun əhəmiyyətindən danışıblar.

Daha sonra Türkiyənin Endoskopik Laparoskopik Cərrahiyyə Dərnəyinin qurucusu, professor Levent Avtan, Travma və Təcili Cərrahi Dərnəyin rəhbəri, professor Orxan Alimoglu, Ostomi Cərrahi Dərnəyinin başqanı, professor Ömər Alabas, İstanbul Tibb Universitetinin professoru Hakan Yanar, eləcə də ATU-nun Ümumi Cərrahiyyə kafedrasının müdiri, professor Elçin Ağayev, ATU-nun II Cərrahiyyə kafedrasının müdiri, professor Rauf Ağayev və dosenti Rasim Cəfərli  qarın boşluğu üzvləri xəstəliklərinin müalicəsində laparoskopiyanın üstünlüklərinə dair məruzələrlə çıxış ediblər.

Simpoziumda, həmçinin təcili cərrahiyyədə laparoskopiya, qastroektonomiyada cərrahi texniki detallar, qaraciyər exinokkozunun diaqnostikası və müalicəsində laparoskopik əməliyyatların xüsusiyyətləri və digər məsələlər barədə mütəxəssislərin fikirləri səsləndirilib.

Sonda məruzəçilər onlara ünvanlanan sualları cavablandırıblar.