7-12 fevral tarixlərini əhatə edən Təcili Tibbi Yardım Sisteminin Təkmilləşdirilməsi Həftəsi çərçivəsində Ümumdünya Səhiyyə Təşkilatının (ÜST) Azərbaycandakı ölkə ofisi tərəfindən 1 saylı Şəhər Klinik Xəstəxanasında “Təcili tibbi yardımda xəstəliklərin idarə olunması” və “Təkmil kardiovaskulyar həyata dəstək” kursları təşkil edilib.

Səhiyyə Nazirliyi, Azərbaycan Tibb Universiteti, İcbari Tibbi Sığorta üzrə Dövlət Agentliyi və Tibbi Ərazi Bölmələrinin İdarəetmə Birliyi (TƏBİB) ilə əməkdaşlıq çərçivəsində keçirilən kurslar türkiyəli mütəxəssislər tərəfindən tədris olunub. Kurslar, həmçinin Tibb Universitetinin Təcili Tibb kafedrasının işçilərinin, eləcə də Klinik Tibbi Mərkəzin, Respublika Klinik Xəstəxanasının, Sumqayıt və Şamaxı regionlarındakı tibb müəssisələrinin təcili tibbi yardım işçilərinin təcili tibbi yardım zamanı ortaya çıxan xəstəliklərin müalicəsi üzrə peşə biliklərinin inkişaf etdirilməsi məqsədi ilə təşkil olunub.

“Təcili tibbi yardımda xəstəliklərin idarə olunması” kursu ərzində iştirakçılar təcili yardımda tez-tez rast gəlinən 6 müxtəlif halın idarə olunması üzrə 3 müxtəlif situativ izah vasitəsilə praktiki biliklər əldə ediblər.

Təlim proqramının ikinci hissəsini ehtiva edən “Təkmil kardiovaskulyar həyata dəstək” kursunda isə iştirakçılar ürək-damar xəstəliklərinə səbəb olan və həyati təhlükə yaradan halların mütərəqqi tibbi prosedurlar və dərmanların köməyilə aradan qaldırılmasına dair texniki bacarıqlarını artırıblar.

Ümumilikdə, 7-12 fevral tarixləri arasında keçirilən kurslar Azərbaycanda təcili tibbi yardım xidmətinin təşkilinin gücləndirilməsini hədəfləməklə, Ümumdünya Səhiyyə Təşkilatının yerli tibb işçilərinin müvafiq bilik və bacarıqlarının artırılması istiqamətində gördüyü tədbirlər silsiləsinin tərkib hissəsidir.