Ədliyyə Nazirliyinin Tibb Baş İdarəsinin rəisi, tibb xidməti general-mayoru Rafael Mehdiyevlə Azərbaycan Vərəm Əleyhinə QHT Koalisiyasının üzvləri arasında görüş keçirilib.
Aztibb.az xəbər verir ki, görüş zamanı idarə rəisi Rafael Mehdiyev Ədliyyə Nazirliyinin Tibb Baş İdarəsinin fəaliyyəti ilə bağlı məlumat verib. O, eyni zamandaAzərbaycan Vərəm Əleyhinə QHT Koalisiyasının fəaliyyətini yaxından izlədiyin bildirib.
Azərbaycan Vərəm Əleyhinə QHT Koalisiyasının sədri, Sağlamlığa Xidmət İctimai Birliyinin rəhbəri Elçin Muxtarlı koalisiya üzvlərini qəbul etdiyi üçün Rafael Mehdiyevə təşəkkür edib.
Elçin Muxtarlı qeyd edib ki, rəhbərlik etdiyi qurum Şərqi Avropa və Mərkəzi Asiya ölkələrinin regional vərəm proqramı (TB REP 2) çərçivəsində 10 ölkənin 21 dövlət qurumu nümayəndəsini vərəmə son qoyulması sahəsində çoxsahəli tərəfdaşlığın inkişafına verdiyi mühüm töhfəyə və vərəm sahəsində fəaliyyət göstərən vətəndaş cəmiyyəti təşkilatları və icmalarla əməkdaşlığa açıq olduğuna görə “Award For Partnership To End TB” (Vərəmə son qoymaq üçün tərəfdaş mükafatı) ilə təltif edib.
Bildirib ki, Vərəm Üzrə Avropa Koalisiyasının qərarına görə Ədliyyə Nazirliyinin Tibb Baş İdarəsinin rəisi Rafael Mehdiyev də bu mükafata layiq görülüb.
Daha sonra Koalisiya sədri Vərəm Üzrə Avropa Koalisiyası adından mükafatı Rafael Mehdiyevə təqdim edib.
Görüş müzakirələrlə davam edib.
