Bioloji Təbabət Klinikasının onkoloqu Rəna Niftəliyeva süd vəzi əməliyyatı keçirtmiş xanımlara bir sıra tövsiyyələrini verib.

 

Həkim bəzən əməliyyatdan sonra nə etməli olduğunu bilməyən pasiyentlərə rast gəldiyini söyləyib: "Xanımlar həkimləri tərəfindən məlumatlandırıldığını bildirir, lakin söhbət zamanı özlərinin də bununla maraqlanmadığı məlum olur".

 

Onkoloq qeyd edib ki, cərrahi əməliyyat zamanı süd vəzinin bir hissəsi və ya hamısı qoltuqaltı limfa düyünləri ilə birlikdə çıxarılır. Bu zaman həmin nahiyədə limfa dövranı, limfa axını pozulur və bu, gələcəkdə qolun şişməsinə səbəb olur.

 

Rəna Niftəliyeva əməliyyatdan sonra davamlı olaraq həkimin tövsiyə etdiyi idman hərəkətlərinə başlamağı məsləhət görüb. O, əməliyyat sonrası diqqət edilməli əsas məqamlara diqqət çəkib:

 

- Düzgün qidalanma. Süd vəzi əməliyyatından sonra qadağa qoyulan xüsusi qida yoxdur. Yalnız tərkibində fitoestrogen olan soya, mərci kimi qidalardan, qırmızı ət, rafine şəkər, brokoli kimi qidaların çox qəbul olunması tövsiyə olunmur. Ümumiyyətlə isə, maye qəbulunun çoxaldılması, sağlam qidalanma məsləhətdir;

- Kilo almamağa çalışmaq. Bu xəstəliyin təkrarlanması riskini artırır. Bunun üçün artıq kalorili, heyvani yağlardan uzaq durun, çox hərəkət edin;

- Alkoqoldan istifadə etmək olmaz. (Xüsusilə dərman qəbul edirsinizsə alkoqoldan uzaq durun);

- Siqaret kimi zərərli vərdişlərdən uzaq olun. Siqaretdə xərçəng əmələ gətirən kimyəvi maddələr və ağır metallar var ki, bunlar immun sistemini zəiflədir, maddələr mübadiləsini pozur və xərçəng yaradır;

- Pozitiv olun. Bunun üçün gərəkirsə psixoloq məsləhətindən istifadə edin.