TƏBİB-in İdarə Heyəti sədrinin müşavirləri Elmir Bəşirov və Firəngiz Əliyeva Qazi Universitetinin Tibb fakültəsinin dekanı, professor Mustafa Necmi İlhan və dr.Hakan Tüzün ilə görüşüb.

 

Görüşdə Elmir Bəşirov elmi tədqiqat institutlarının əməkdaşları üçün “Elmi tədqiqatların metodologiyası” adlı təlimlərin baş tutmasında göstərdikləri köməkliyə görə qonaqlara TƏBİB rəhbərliyinin təşəkkürünü çatdırıb.

 

Daha sonra çıxış edən Firəngiz Əliyeva qardaş Türkiyə Respublikasında hər sahədə olduğu kimi tibb sahəsində də qarşılıqlı əməkdaşlığın həyata keçirildiyini qeyd edib. Müşavir istər icbari tibbi sığortanın tətbiq edilməsi, istər ixtisaslı kadrların hazırlanmasında Türkiyə modelindən geniş istifadə edildiyini bildirib. O, Vətən müharibəsində və virusla mübarizə tədbirlərində Türkiyədən olan həkimlərin böyük rola sahib olduğunu vurğulayıb.

 

Mustafa Necmi İlhan isə çıxışında onlara göstərilən yüksək dəyərə görə İcbari Tibbi Sığorta üzrə Dövlət Agentliyinin və TƏBİB-in rəhbərliyinə təşəkkürünü bildirib. Professor N.İlham tibbi sahədə təcrübə mübadilələrinin həyata keçirilməsinin mühüm əhəmiyyətə malik olduğunu qeyd edib.

 

Sonda qonaqlara İTS və TƏBİB adından xatirə hədiyyələri təqdim olunub.