Bu gün Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyevanın və həkim-rezidentlərinin iştirakı ilə “Nevroloji müayinə” mövzusunda növbəti seminar keçirilib.

 

Seminarda çıxış edən klinikanın Nevrologiya şöbəsinin həkim-rezidenti Nigar Paşabəyli-Bəylər nevroloji müayinənin metodları haqqında ətraflı məlumat verib.

 

Həkim bildirib ki, nevroloji müayinə ilk olaraq xəstəyə baxışla başlanır. Xəstənin hərəkətlərinin həcmi, simmetrikliyinə diqqət yetirilir.

 

Onun sözlərinə görə, əzələnin gücü, tonusu, reflekslər (patoloji), hissiyat, beyincik funksiyalarının nevroloji müayinəsi bizə düzgün diaqnoz qoymağımıza istiqamət verir: "Patoloji reflekslərin qeyd olunması zədələnmənin mərkəzi mənşəli olmasını deməyə əsas verir. Lakin burda da bəzi məqamlara diqqət etmək lazımdır. Hipertiroidizimdə, yüksək həssas insanlarda da yalançı patoloji reflekslər qeyd oluna bilər. Meningeal əlamətlərin dəyərləndirilməsi meningit diaqnozunda xüsusi yer tutur. Həmçinin, bu müayinə bizə beyin qişalarının digər səbəblərdən zədələnməsini də diferensasiya etməyə kömək edir".

 

N. Paşabəyli-Bəylər qeyd edib ki, bu müayinələrin spesfikliyi yüksək olsa da, laborator və instrumental müayinə metodları ilə dəstəklənməlidir.

 

Sonda klinikanın həkim-rezidentlərilə birgə mövzu ətrafında geniş müzakirələr aparılıb, suallar cavablandırılıb.