Qanın damar daxilində və ya ürək boşluqlarında laxtalanması tromboz, bu zaman əmələ gələn qan laxtası isə tromb adlanır. Arteriya və ya venalar zədələndikdə qan axınının qarşısının alınması üçün trombosit və fibrindən xüsusi laxta əmələ gəlir.

 

Aztibb.az xəbər verir ki, bu barədə ürək-damar cərrahiyyə uzmanı Cabir Gülmalıyev məlumat verib.

 

Həkim artıq çəkili, az hərəkətli, sağlam həyat tərzi keçirməyən, ayaqlarına daha çox yük düşən, aşağı ətraflarda ortopedik, travmatoloji cərrahiyyə əməliyyatı keçirən insanlarda tromb riskinin yüksək olduğunu bildirib. 

 

Onun sözlərinə görə, patologiyanın inkişafında 3 amil qeyd olunur. Buna Virxov triadası da deyilir:

- qanın tərkibi (hiperkoaqulyasiya və ya trombofiliya);

- damar divarının (endotel hüceyrələrinin) zədələnməsi;

- qan axınının xarakteri (durğunluq, geriyə qayıdış).

 

Cabir Gülmalıyev əlavə edib ki, əsas səbəblərdən biri də ürək damarlarının tutulmasıdır. Ürək damarları tutulduqda onların qidalandırdığı nahiyələr qansız qalır, yığılmır və yığılmayan yerdə tromb yaranır. Nəticədə miokard infarktı baş verir.

 

"Digər səbəb səyrici aritmiyadır. Onun nəticəsində qulaqcıqlarda tromb yaranır. Hərəkətli tromblar çox təhlükəlidir, çünki ürək yığılıb açıldıqda hərəkət edib beyinə, qarın orqanlarına, ağciyərlərə sıçraya bilirlər. Bu isə çox zaman ciddi fəsadla və ya ölümlə nəticələnə bilir", - deyə həkim bildirib.