Yanvarın 19-da ST MED tibb mərkəzində Azərbaycan Könüllü Həkimlər Assosiasiyasının (AKHA) Beynəlxalq əlaqələr şöbəsinin və "Alim" Elmi Assosiasiyasının birgə təşkilatçılığı ilə “Gənc stomatoloqların təkmilləşdirilməsi“ adlı ilk təlim keçirilib.

Aztibb.az xəbər verir ki, təlimin məqsədi xaricdə fəaliyyət göstərən həkimlərin AKHA-nın könüllü tələbə və gənc həkimləri ilə öz təcrübələrini bölüşməsidir.

Təlimdə AKHA-nın sədri, üz-çənə cərrahı Oktay Mehdiyev çıxış edərək ölkəmizdə nəinki könüllü həkimlərə, könüllü tələbələrə də ehtiyac olduğunu vurğulayıb. O, tələbə və gənc həkimlərin inkişafı üçün bu tip təlimlərin mütəmadi keçirilməsinin nəzərdə tutulduğunu deyib.

Sonra ümumi cərrah və mama ginekolog, t.ü.f.d. Sona Əsgərova ikinci Vətən müharibəsində könüllü həkimlərin rolu və əməyi haqqında danışıb.

AKHA-nın Təşkilat Komitəsinin koordinatoru Hüseyn Hüseynzadə AKHA Tələbə Təşkilatı barədə məlumat verib, könüllü olmağın tələbələrin iş həyatındakı rolundan bəhs edib.

Daha sonra çıxış edən AKHA-nın Beynəlxalq əlaqələr üzrə koordinatoru Sabrin Ali Azim bu cür təlimlərin təşkilinin əhəmiyyətini qeyd edib.

Tədbirdə Dr. Tural Mirzəyev tələbə və gənc stomatoloqlar üçün "İnfeksiyaya nəzarət", Dr. Ahdab Ali Azim isə "Təcili və təxirə salınmaz yardım" mövzusunda məruzələrlə çıxış ediblər.

Tələbələrə maketlər üzərində praktik olaraq ilk yardım texnikaları göstərilib.

Hər iki məruzə böyük maraqla dinlənilib.

Sonda tələbələrin çoxsaylı sualları cavablandırılıb.