Klaustofobiya, yəni qapalı məkanda qalmaq qorxusu, ən çox liftlərdən istifadə zamanı özünü büruzə verir. İnsanlarda nəfəs darlığı, baş gicəllənməsi, göz qaralması kimi hallar yaranır. Mütəxəssislərin dediyinə görə, bu vəziyyət daha çox düşüncələrin düzgün idarə olunmamasından asılıdır.

Aztibb.az xəbər verir ki, Azərbaycan Dövlət Pedaqoji Universitetinin müəllimi, psixologiya üzrə fəlsəfə doktoru Yeganə Əsgərovanın AZƏRTAC-a verdiyi məlumata görə, belə fobiyanın yaranmasında çox vaxt genetik faktor rol oynayır, lakin uşaq yaşlarında müxtəlif travmaların yaşanması da ciddi əhəmiyyət kəsb edir: “Bəzən valideynlər uşağa cəza verərkən onu qaranlıq otağa, zirzəmiyə salır, yaxud vahiməli filmlərdəki səhnələrlə qorxudur və bu halda bəzən nəfəs darlığı deyilən bir düşüncə yaranır. Əslində isə yaranan nəfəs darlığı yox, həyəcan pozuntusudur”.

Fobiyanın yaranma səbəbi müəyyən edildikdən sonra müalicəyə başlamaq olar. Psixoloqun dediyinə görə, həmin qorxu müxtəlif mərhələlərlə aradan qaldırılır: “İlk növbədə, düşüncələr üzərində koqnitiv iş aparılmalıdır. Sonra isə ev tapşırığı olaraq ekspozisiyalar verilir. Məsələn, əvvəlcə açıq liftə girib çıxmaq, ikinci tapşırıq liftə minəndə özünə nəzarəti saxlamaq şərtilə dərindən nəfəs alaraq bir mərtəbə qalxıb-düşməkdən, sonrakı tapşırıq isə iki, üç və daha çox mərtəbə qalxıb-enməkdən ibarət olur”.

Liftin dizaynı da fobiyanın aradan qaldırılmasında rol oynayır. İçəridə güzgünün olması fikri bir qədər yayındıraraq qismən də olsa, qorxudan uzaqlaşmağa səbəb olur.

Lakin bütün cəhdlərə baxmayaraq, düşüncələri idarə etmək mümkün deyilsə və müxtəlif narahatlıqlar yaranırsa, onda dərman müalicəsinə başlanılır.