Bir sual, bir cavab – COVID-19 diabetə necə təsir edir?
14.01.2022 12:46
Diabeti olan xəstələrdə hər hansı bir xəstəlik, o cümlədən COVID-19 zamanı aşağı müqavimət, yəni bədənin patogenin öhdəsindən gələ bilməməsi, ürək-damar, tənəffüs sistemi, mərkəzi sinir sistemi tərəfindən ağırlaşmalar və s. hallar xarakterikdir.
 
Qanın yoluxmasının yüksək riski, pnevmoniyaların ağır və uzun müddət davam etməsi, habelə tənəffüs çatışmazlığı ehtimalı ciddi təhlükə yaradır.
 
COVID-19-a yoluxduqda qanda şəkərin səviyyəsini nəzarətdə saxlamaq, qlikemik indeksi vaxtında korreksiya etmək vacibdir. Əks halda patogen mikrofloranın çoxalması üçün əlverişli mühit yaranır, pnevmoniya müalicəsi çətinləşir, sözün əsl mənasında artıq zəifləmiş orqanizm daha da tükənir.
 
Ölümlərin 10%-dən çoxu ürək-damar patologiyaları olan COVID-19 xəstələrində baş verir.
 
Diabeti olanların koronavirus xəstəliyinə tutulmaq riski yüksəkdir, lakin virusa yoluxma mexanizmi insandan insana müxtəlif ola bilər. Koronavirus infeksiyasının qarşısının alınması üçün belə xəstələrin ilk növbədə gündəlik preventiv tədbirlərə əməl etməsi vacibdir. İmmuniteti gücləndirməklə, həmçinin pəhriz qaydalarına əməl etməklə, xəstəliyin mənfi təsirini minimuma endirmək olar.
 
Orqanizmin müqavimətinin gücləndirməsinin əsas yolları düzgün qidalanma, müntəzəm idman, istirahət və normal yuxu rejimidir. Bu xəstələrin müalicəsində pəhriz mühüm rol oynayır və şəkərin səviyyəsinin normal qalmasına kömək edir.
 
Həkim-endokrinoloq Səmayə Əliyeva
 
Aztibb.az