Mütəxəssislər saç boyalarının xərçəngə səbəb olub olmadığını araşdırıb.

Aztibb.az Meddaily.ru-ya istinadən xəbər verir ki, araşdırmada 117.200 amerikalı qadından alınan məlumatlar analiz edilib. Saç boyalarında sidik kisəsi və döş xərçənginə səbəb ola biləcək birləşmələr olduğu bilinir. Boyalarla bu xərçəng növləri arasında əlaqənin müəyyənləşdirilməsi 36 il davam edib.

Araşdırma nəticəsində məlum olub ki, boyalardan əhəmiyyətli dərəcədə mənfi təsir aşkar edilməyib. Lakin tədqiqatçılar saç boyaları ilə bazal hüceyrə karsinoması, hormon reseptorları ilə süd vəzisi və yumurtalıq xərçəngi arasında əlaqə tapıblar.

Bundan əlavə, yalnız təbii tünd saçlı qadınlarda Hodgkin lenfoma riski artır və doğuşdan sarı saçlı qadınlarda bazal hüceyrə karsinoması riski daha yüksək olur.

Mütəxəssislər bildirib ki, xərçəng riski həssaslıq genotiplərinə (məsələn, NAT1 və ya NAT2 genlərinin xüsusiyyətləri) bağlıdır.

Ümumdünya Səhiyyə Təşkilatı da boyalarla davamlı təmasda olan bərbərlərdə xərçəng riskinin yüksək olduğunu qəbul edir.