Bu gün Azərbaycan Tibb Universitetinin (ATU) Tədris Terapevtik Klinikasının müalicə işləri üzrə direktor müavini Fəridə Hacıyevanın və həkim-rezidentlərinin iştirakı ilə “Böyrək transplantasiyasından sonrakı xəstələrdə COVID-19-un klinik təhlili” mövzusunda seminar keçirilib.

 

Tədbirdə çıxış edən klinikanın Nefrologiya şöbəsinin həkim-rezidenti Ülviyyə Nağızadə böyrək transplantasiyasından sonra koronavirus keçirmiş xəstələr və onların müalicə metodları barədə ətraflı məlumat verib.

 

Bildirib ki, 2020-ci ildə böyrək transplantasiyası əməliyyatı icra olunmuş xəstə bir il sonra halsızlıq, boğulma, sidik ifrazının azalması şikayətləri ilə xəstəxanaya daxil olub. Aparılan müayinələr nəticəsində ağciyərlərdə 90% buzlu şüşə və eyni zamanda, oliqouriya müşahidə olunub: "Qanda kreatinin 325 mg/dl idi. Xəstəyə antiviral müalicə başlandıqdan sonra, ambulator şəraitdə aldığı immunsupressiv müalicə ilk 3 gün müddətində dayandırılıb, lakin sonrakı müayinə və müalicələrə əsasən immunsupressiv dərman terapiyası davam etdirilib. 3 həftəyə yaxın aparılmış müalicə fonunda xəstənin sidik ifrazı tam bərpa olunub, qanda kreatinin miqdarı 220 mg/dl təşkil edib".

 

Həkimin sözlərinə görə, xəstədə ilkin olaraq kəskin böyrək zədələnməsi diaqnozu müəyyənləşdirilib. Aparılan müalicə nəticəsində böyrək dəyərləri, sidik ifrazı bərpa olunub və bazis immunsupressiv terapiyası ilə nefroloq nəzarəti altında xəstə evə buraxılıb.

 

Sonda klinikanın digər həkim-rezidentlərilə birgə mövzu ətrafında geniş müzakirələr aparılıb, suallar cavablandırılıb.