Son zamanlar gənclər arasında qəlyanın siqaretdən daha az ziyanlı olmasına dair yanlış məlumatlar yayılıb. 

Aztibb.az xəbər verir ki, aparılan tədqiqatlar qəlyanın siqaret çəkməkdən daha ziyanlı olduğunu göstərir:

Qəlyanda tüstü su filtrdən keçir. Qəlyan çəkənlərin fikrinə görə, bu zaman tüstü ziyanlı maddələrdən tam "təmizlənir". Lakin su tüstünü ziyanlı maddələrin az bir qismindən təmizləyir, əsas hissəsi isə qalır.

Araşdırmalar göstərir ki, 1 saat ərzində qəlyan çəkən insan 1 siqaret çəkənlə müqayisədə 100-200 dəfə daha çox tüstü udur. Bu zaman onun orqanizminə daxil olan dəm qazının miqdarı 1 qutu siqaret çəkən insanla eynidir. Dəm qazı ən güclü zəhərlərdən biridir.

Qəlyan çəkən insanda siqaret çəkənlərlə müqayisədə, tüstü ağciyərin daha dərin hissələrinə daxil olur ki, bu da daha ağır pozulmaların inkişafına səbəb olur.

Qəlyan çəkən insanlar birdəfəlik müştükdən istifadə edir və onların fikrinə görə, bu "sterilliyi" təmin edir. Lakin birdəfəlik müştük qəlyan çəkən insanı infeksiya və mikroblardan qorumur. Mikroblar qəlyan şlanqlarında və qabda toplanır. Hər qəlyan çəkən insandan sonra bu şlanq və qab yaxşı-yaxşı yuyulmalıdır. Təbii ki, bu hər dəfə baş vermir və nəticədə insanda infeksiyalara yoluxma riski yüksək olur.

İsrail alimləri araşdırmalar zamanı aşkar ediblər ki, qəlyan çəkmək qida borusu və ağciyər xərçəngi riskini xeyli artırır.