Heydər Əliyev Fondunun dəstəyi ilə Rusiyadan dəvət olunan professor-həkim heyətinin üzvləri Azərbaycan Tibb Universitetinin (ATU) Tədris Terapevtik Klinikasında olublar.

İ.M.Seçenov adına Birinci Moskva Tibb Universitetinin Pulmonologiya kafedrasının müdiri, professor Sergey Avdeyevin rəhbərlik etdiyi nümayəndə heyəti koronavirusla mübarizədə azərbaycanlı həmkarlarına dəstək məqsədilə ölkəmizə gəlib.

Rusiyalı professor-həkim heyəti öncə klinikanın direktoru, professor Surxay Musayevlə görüşüb, buradakı şəraitlə yaxından tanış olublar.

Sonra klinikanın müalicə işləri üzrə müavini (baş həkim) Fəridə Hacıyeva, həkim-infeksionist Aygül Əliyeva və şöbələrdə çalışan həkim heyəti ilə koronavirusla mübarizə sahəsində ikitərəfli təcrübə və fikir mübadiləsi aparılıb.

Rusiyali professor-həkim heyəti klinikada müalicə alan xəstələrlə də görüşərək, onların vəziyyəti ilə tanış olub, xəstələrin bəzilərini müayinə edərək onların müalicəsi istiqamətində fikirlərini bölüşüblər.