Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan “İnnovasiyalar Mərkəzi”nin struktur bölmə rəhbərlərinin iştirakı ilə Mərkəzin “Salam Doktor" şirkəti ilə birgə hazırladığı "Salam Doktor - onlayn həkim xidməti” layihəsinin təqdimatı olub.
Tədbirdə "Salam Doktor" şirkətinin baş həkimi Cavid Baloğlanov tibb sahəsində innovativ yeniliklərindən olan “Teletibb xidmətləri” haqqında təqdimatla çıxış edib. O, həkimlərlə pasiyentlər arasında telekommunikasiya texnologiyaları vasitəsilə aparılan konsultasiyaların üstünlüklərindən və məqsədlərindən danışıb. C.Baloğlanov, həmçinin 5 saylı “ASAN xidmət” mərkəzlərində vətəndaşlara fərdi şəkildə təqdim olunan audio və video məsləhət, yazılı müraciət, eləcə də müayinə nəticələrinin təhlili ilə bağlı xidmətlər barədə məlumat verib.
Təqdimat zamanı iştirakçıların layihə ilə bağlı fikirləri dinlənilib və onları maraqlandıran suallar cavablandırılıb.
Layihənin məqsədi həkimlərlə pasiyentlər arasında coğrafi hədləri aradan qaldıraraq əlçatan və peşəkar tibbi xidmətlər təqdim etməklə əhalinin sağlamlıq səviyyəsinin yüksəldilməsi və həyat keyfiyyətinin yaxşılaşdırılmasıdır.
Hazırda layihə çərçivəsində təqdim olunan xidmətlər "Salam Doktor" şirkəti tərəfindən 5 saylı Bakı "ASAN xidmət" mərkəzlərində həyata keçirilir.
Qeyd edək ki, xidmət alan vətəndaşlar "Onlayn həkim" xidmətindən və "Atəşgah” Sığorta şirkəti tərəfindən əlavə təqdim olunan "Təcili hospitalizasiya, reanimasiya" və "Təcili yardım" kimi sığorta xidmətlərindən daha geniş formada istifadə edə bilərlər.
