Hamiləlik dönəmində gözlənilməyən problemlərdən biri də - böyrək daşı xəstəliyidir. Son illərdə aparılan tibbi araşdırmaların nəticələrinə görə, qadınlarda böyrək daşı problemləri kişilərə nisbətən daha çox müşahidə olunur. Buna görə də ana olmağı planlaşdıran qadınlar, hamilə qalmazdan öncə mütləq böyrəklərini müayinə etdirməlidir (daş kontrolu).

Aztibb.az xəbər verir ki, bu barədə nefroloq Barat Yusubov sosial şəbəkədə paylaşım edib.

Həkim bildirib ki, erkən müayinələr gözlənilməz pis sürprizlərlə qarşılaşmağı önləyə bilər. Bu xoşagəlməz hallardan biri də böyrək daşı problemi olan hamilə qadınların vaxtından tez doğum etməsidir.

"Hamiləykən böyrək daşı problemi olduğunda bəzən zəif bel və qarın ağrısı, bəzən isə şiddətli ağrılar ola bilər. Böyrək infeksiyasında olduğu kimi, ürək bulanma, qusma, qızdırma, böyürlərdə ağrılar yarana bilər. Bəzi hallarda isə klinik diaqnozun təyini çətinləşir. Çünki, bu ağrılar apendisit və erkən doğum ağrıları ilə səhv salınır, böyrək daşının olması heç nəzərə alınmır", - deyə B.Yusubov bildirib.

Onun sözlərinə görə, daş müalicəsi olunmadıqda bu, uterusda (uşaqlıq) sıxılmalara səbəb olub, erkən doğumla nəticələnə bilər. Buna görə də, bu tip ağrılarla xəstəxanaya müraciət edən hamilə qadının diaqnostikasında ultrasəs müayinəsinin aparılması çox vacibdir.